ഇരിട്ടി: നാനാവിധ സംസ്‌കാരങ്ങളെ ആദരിക്കുകയും പാര്‍ക്കാന്‍ ഇടം നല്‍കുകയും ചെയ്യുന്ന ഭാരതം നിര്‍വചിക്കാനാവാത്ത മഹത്വമുള്ള രാഷ്ട്രമാനെന്ന് ഓസ്‌ക്കാര്‍ ജേതാവ് റസൂല്‍ പൂക്കുട്ടി. മുഴക്കുന്ന് മൃദംഗശൈലേശ്വരി ക്ഷേത്രം ദേവസ്വത്തിന്റെ സ്വീകരണം എറ്റുവാങ്ങി സംസാരിക്കുകയായിരുന്നു അദ്ദേഹം.
ചരിത്രമെടുത്തു നോക്കിയാല്‍ ഇവിടെ വന്നെത്തിയ സംസ്‌കാരങ്ങളെയെല്ലാം അവര്‍ക്ക് താമസിക്കാന്‍ ഇടംനല്‍കി നമ്മള്‍ എറ്റുവാങ്ങുകയായിരുന്നു. വിശ്വാസം നമ്മുടെ ഉള്ളിന്റെ ഉള്ളിലാണ് വേണ്ടത്. അതിന് ജാതിയും മതവും വേണ്ടന്നും അദ്ദേഹം പറഞ്ഞു. അഡ്വ. സണ്ണിജോസഫ് എം.എല്‍.എ ഉദ്ഘാടനം ചെയ്തു. മലബാര്‍ ദേവസ്വം പ്രസിഡന്റ് സജീവ് മാറോളി അധ്യക്ഷനായി. ദേവസ്വം ബോര്‍ഡ് ഏരിയ ചെയര്‍മാന്‍ എം.പി ഉണ്ണികൃഷ്ണന്‍, എക്‌സിക്യൂട്ടീവ് ഓഫിസര്‍ എ.വി അശോകന്‍, മുഴക്കുന്ന് ഗ്രാമപഞ്ചയത്ത് പ്രസിഡന്റ് ബാബു ജോസഫ്, ഡോ.ടി രാമരാജന്‍, രാധാകൃഷ്ണന്‍ കൈലാസ് പ്രസംഗിച്ചു. ദേവസ്വം പ്രസിഡന്റ് സജീവ് മാറോളി പൂക്കുട്ടിയെ പൊന്നാട അണിയിച്ച് ആദരിച്ചു. മൃദംഗശൈലേശ്വരി ക്ഷേത്രത്തിന്റെ വെബ്‌സൈറ്റ് ഉദ്ഘാടനം റസൂല്‍ പൂക്കുട്ടി നിര്‍വഹിച്ചു. തുടര്‍ന്ന് വിദ്യാര്‍ഥികളുമായി അദ്ദേഹം സംവദിച്ചു.