ആറ്റിങ്ങല്‍: നിയന്ത്രണം വിട്ട സ്വകാര്യ ബസ് കടയ്ക്കുള്ളില്‍ പാഞ്ഞുകയറി. തലനാരിഴയ്ക്ക് വന്‍ ദുരന്തം ഒഴിവായി. ആറ്റിങ്ങല്‍ സ്വകാര്യ ബസ് സ്റ്റാന്റില്‍ നിന്നും സര്‍വിസിനായി പുറത്തേയ്ക്കിറങ്ങുമ്പോള്‍ ബ്രേക് തകരാര്‍ മൂലം നിയന്ത്രണം വിട്ട് എതിര്‍വശത്തുള്ള ഷോപ്പിങ് കോംപ്ലക്‌സില്‍ ഓണത്തോടനുബന്ധിച്ച് താല്‍ക്കാലികമായി കെട്ടിയ തുണിക്കടയിലേയ്ക്കാണ് കടയുടെ അരമതില്‍ തകര്‍ത്ത് ബസ് ഇടിച്ചു കയറിയത്.
കടയ്ക്കകത്ത് സാധനം വാങ്ങാനെത്തിയ പത്തോളം പേര്‍ ബസിന്റെ അപകടകരമായ വരവു കണ്ട് കടക്കുള്ളിലേയ്ക്ക് ഓടിക്കയറിയതിനാല്‍ വന്‍ ദുരന്തം ഒഴിവായി. ഇതിനു മുന്നില്‍ ഫുട്ട്പാത്തില്‍ സ്ത്രീകള്‍ പച്ചക്കറിക്കച്ചവടം നടത്തിയിരുന്നു.