കോഴിക്കോട്: പ്രധാനമന്ത്രിയുടെ പ്രസംഗം തത്സമയം സംപ്രേഷണം മലബാര്‍ ക്രിസ്ത്യന്‍കോളജില്‍ കെ.എസ്.യു പ്രവര്‍ത്തകര്‍ തടഞ്ഞു.
ദീന്‍ദയാല്‍ ഉപാധ്യായ ജന്മശതാബ്ദിയുടേയും സ്വാമി വിവേകാനന്ദന്റെ ചിക്കാഗോ പ്രസംഗത്തിന്റ 125ാം വാര്‍ഷികത്തിന്റെയും അനുസ്മരണത്തോടനുബന്ധിച്ചുള്ള പ്രസംഗമാണ് കോളജില്‍ സംപ്രേഷണം ചെയ്തത്. രാജ്യത്തെ എല്ലാ യൂനിവേഴ്‌സിറ്റികളുടെയും അഫിലിയേറ്റഡ് കോളജുകളില്‍ രാവിലെ 10.30 ഓടെ ഇത് സംപ്രേഷണം ചെയ്യണമെന്ന് നിര്‍ദേശമുണ്ടായിരുന്നു.
കൃത്യ സമയത്ത് കോളജിന്റെ കംപ്യൂട്ടര്‍ സെന്ററില്‍ പ്രസംഗം തുടങ്ങിയെങ്കിലും കെ.എസ്.യു പ്രവര്‍ത്തകര്‍ പ്രകടനവുമായെത്തി തടയുകയായിരുന്നു. നാല്‍പത് മിനുട്ടോളം പ്രസംഗം കേള്‍പ്പിച്ചിരുന്നു. എന്നാല്‍ കെ.എസ്.യു പ്രവര്‍ത്തകരെത്തി പ്രതിഷേധം തുടങ്ങിയ ഉടനെ കോളജ് അധികൃതര്‍ പ്രസംഗം കേള്‍പ്പിക്കുന്നത് നിര്‍ത്തി വച്ചു.