ചേന്ദമംഗല്ലൂര്‍: ഡി.വൈ.എഫ്.ഐ പ്രവര്‍ത്തകന്റെ ഓട്ടോറിക്ഷ അജ്ഞാതര്‍ അടിച്ചു തകര്‍ത്തതായി പരാതി. ഡി.വൈ.എഫ്.ഐ പുല്‍പറമ്പ് യൂനിറ്റ് സെക്രട്ടറി സബീറിന്റെ വാഹനമാണ് ഇന്നലെ രാത്രി തകര്‍ത്തത്. സുഹൃത്തിനെ ആശുപത്രിയിലാക്കുന്നതിനായി പുല്‍പറമ്പില്‍ ഓട്ടോ നിര്‍ത്തിപ്പോയതായിരുന്നു. തിരിച്ചുവന്ന സമയത്ത് ഓട്ടോ തകര്‍ത്ത നിലയിലായിരുന്നുവെന്ന് ഇദ്ദേഹം പറഞ്ഞു. സ്ഥലത്തെ മദ്യ, മയക്കുമരുന്ന് മാഫിയയുടെ പ്രവര്‍ത്തനങ്ങള്‍ക്കെതിരേ ഡി.വൈ.എഫ്.ഐ ശക്തമായ നടപടികള്‍ സ്വീകരിച്ചിരുന്നതായും ഇതിന്റെ ഭാഗമായാണോ അക്രമം നടന്നതെന്നും സംശയിക്കുന്നതായി ഡി.വൈ.എഫ്.ഐ പ്രവര്‍ത്തകര്‍ വ്യക്തമാക്കി. മുക്കം പൊലിസില്‍ പരാതി നല്‍കിയിട്ടുണ്ട്.