മീനങ്ങാടി: ഭൂമിയുടെ നിലനില്‍പ് കൃഷിയിലൂടെ എന്ന സന്ദേശമുയര്‍ത്തി തരിശിട്ടിരുന്ന പാടം പച്ചപ്പണിയിച്ച് പാലക്കമൂല സി.പി.ഐ (എം) ബ്രാഞ്ച് കമ്മിറ്റി. രണ്ടു വര്‍ഷത്തോളമായി കൃഷി ചെയ്യാതെ കിടന്നിരുന്ന പാലക്കമൂല കുറ്റിമുണ്ട പരേതനായ ഹരീന്ദ്രന്റെ രണ്ടേക്കര്‍ കൃഷിയിടം പാട്ടത്തിനെടുത്താണ് ബ്രാഞ്ച് കമ്മിറ്റിയുടെ നേതൃത്വത്തില്‍ പ്രവര്‍ത്തകര്‍ നെല്‍കൃഷിയിറക്കിയത്.
നാല്‍പ്പതിനായിരത്തോളം രൂപയോളമാണ് ഇതിന്റെ ചെലവ്. കൃഷിക്കായുള്ള മുഴുവന്‍ തുകയും ബ്രാഞ്ച് കമ്മിറ്റി അംഗങ്ങളില്‍ നിന്നാണ് കണ്ടെത്തുന്നത്. നെല്ലിനമായ  വലിച്ചൂരിയാണ്  രണ്ടേക്കര്‍ പാടത്ത് നട്ടിരിക്കുന്നത്. പുതുതലമുറയെ കാര്‍ഷിക മേഖലയിലേക്ക് ആകര്‍ഷിക്കുകയെന്ന ലക്ഷ്യവും ഇതിനു പിന്നിലുണ്ട്. കൃഷിയിറക്കല്‍ സി.പി.ഐ(എം) ജില്ലാ സെക്രട്ടറി സി ഭാസ്‌കരന്‍ ഉദ്ഘാടനം ചെയ്തു. വേണുഗോപാല്‍, അന്‍സാര്‍, പി.ടി ഉലഹന്നാന്‍, നാസര്‍, ഷിജു, ഷീല, ശ്യാമള, ബൈജു, സ്വപ്ന തുടങ്ങിയവര്‍ നേതൃത്വം നല്‍കി.