കൊട്ടിയം: തൃക്കോവില്‍വട്ടം ഗ്രാമപഞ്ചായത്തില്‍ തെരുവുകളെല്ലാം നായകള്‍ കൈയടക്കിയതോടെ ജനം പുറത്തിറങ്ങുന്നത് ഭയപ്പാടില്‍. പഞ്ചായത്തിലെ മുഖത്തല, പാങ്കോണം, തൃക്കോവില്‍വട്ടം, കണ്ണനല്ലൂര്‍, കണ്ണനല്ലൂര്‍ സൗത്ത്, ചേരീക്കോണം വാര്‍ഡുകളെല്ലാം മാസങ്ങളായി തെരുവുനായകളുടെ പിടിയിലാണ്. എന്നിട്ടും അധികാരികളാരും തിരിഞ്ഞുനോക്കാറില്ലെന്ന് പരാതിയുണ്ട്.
നായകളുടെ ശല്യം രാത്രികാലങ്ങളില്‍ അതിരൂക്ഷമായിട്ടുണ്ട്. പഞ്ചായത്തിലെ ഭരണതലത്തില്‍ മുന്നണികകത്തുണ്ടായ പ്രശ്‌നങ്ങള്‍ കുടിവെള്ളം, തെരുവുനായപ്രശ്‌നം, ആരോഗ്യവകുപ്പ് ഇടപെടല്‍ എന്നിവയെ കാര്യമായി ബാധിച്ചിട്ടുണ്ട്.
ഇറച്ചിക്കടകളില്‍ നിന്നും മത്സ്യക്കടകളില്‍ നിന്നും മറ്റും മാലിന്യങ്ങള്‍ തോന്നിയയിടങ്ങളില്‍ പുറന്തള്ളുന്നതാണ് തെരുവുനായകള്‍ ഇത്രമാത്രം വര്‍ധിക്കാന്‍ കാരണമെന്നാണ് വ്യാപകമായി ഉയരുന്ന ആക്ഷേപം. കോഴിക്കടകളില്‍ നിന്നാണ് ഏറ്റവും കൂടുതല്‍ മാലിന്യം പുറന്തള്ളുന്നത്.
ചിലര്‍ നിയമാനുസൃതം മാലിന്യം സംസ്‌കരിക്കുന്നുണ്ടെങ്കിലും ഭൂരിഭാഗം പേരും റോഡുകളിലും തോടുകളിലും മറ്റും അലക്ഷ്യമായി വലിച്ചെറിയുകയാണ് ചെയ്യുന്നത്. ഇതിനെതിരേ നടപടി സ്വീകരിക്കേണ്ട തദ്ദേശ സ്വയംഭരണ സ്ഥാപനങ്ങളോ ബന്ധപ്പെട്ട ഉദദ്യോഗസ്ഥരോ ചെറുവിരല്‍ പോലും അനക്കുന്നില്ലെന്നാണ് നാട്ടുകാര്‍ പറയുന്നത്.ഇതിനു പുറമെ പഞ്ചായത്തിന് മൂന്നര കിലോമീറ്റര്‍ ചുറ്റളവില്‍ സര്‍ക്കാരിന്റെ രണ്ട് ബിവറേജസ് ഔട്ട്‌ലെറ്റുകളടക്കം നിരവധി മറ്റു സ്വകാര്യബാറുകളുമുള്ള സ്ഥലമാണ് തൃക്കോവില്‍വട്ടം.
അതുകൊണ്ടുതന്നെ മദ്യപിക്കുന്നവരുടെ എണ്ണം ഈപ്രദേശങ്ങളില്‍ താരതമ്യേന കൂടുതലാണ്. ഇവര്‍ പലരും പരസ്യമായി കടത്തിണ്ണകളിലും ഇരുന്ന മദ്യപിക്കുന്നതായി പരാതിയുണ്ട്. മദ്യത്തോടൊപ്പം കഴിക്കുന്ന പൊരിച്ച കോഴിഇറച്ചിയും മറ്റു അവശിഷ്ടങ്ങളും അവിടെ തന്നെ ഇവര്‍ ഉപേക്ഷിക്കുന്നതായി നാട്ടുകാര്‍ പറയുന്നു. അതിനാല്‍ നായകള്‍ പെരുകാന്‍ കാരണമായിട്ടുണ്ട്.
രാപ്പകല്‍ വ്യത്യാസമില്ലാതെയാണ് തെരുവുനായകള്‍ പഞ്ചായത്തിലാകെ വിഹരിക്കുന്നത്. രാത്രികാലങ്ങളില്‍ നായയുടെ ആക്രമം ഭയന്ന് പലരും പുറത്തിറങ്ങാറില്ല. രാത്രി കാലങ്ങളില്‍ ബൈക്ക് യാത്രക്കാരെയും നായകള്‍ അക്രമിക്കുന്നുണ്ട്. അതിരാവിലെ പത്രവിതരണം നടത്തുന്നവര്‍ തെരുവുനായ പെരുകിയതോടെ ഭീഷണിയിലാണ്.
കണ്ണനല്ലൂരില്‍നിന്ന് ഉള്ള കുണ്ടറ റോഡ് ഉള്‍പ്പെടെയുള്ള ഭാഗങ്ങളിലും തെരുവുനായകളുടെ ശല്യം അതിരൂക്ഷമാണ്. പഞ്ചായത്തിലൂടെ കടന്നു പോകുന്ന മറ്റ് ഇടറോഡുകളിലുമെല്ലാം നായശല്യം ഏറിയതായി നാട്ടുകാര്‍ പറയുന്നു. വിദ്യാലയങ്ങളിലേക്കും അങ്കണ്‍വാടികളിലേക്കും മറ്റും പോകുന്ന കുട്ടികളടക്കമുള്ളവര്‍ക്ക് ഇതിനാല്‍ വന്‍ ഭീഷണിയാണ് നേരിടുന്നത്. തൃക്കോവില്‍വട്ടം ഗ്രാമ പഞ്ചായത്ത് നിലവില്‍ ഇടതുമുന്നണിയാണ് ഭരിക്കുന്നത്.
ഇവിടെ ഭരണത്തില്‍ ആദ്യം മുതല്‍ തന്നെ പാര്‍ട്ടികള്‍ തമ്മില്‍ അസ്വാരസ്യങ്ങളുണ്ട്. ജനങ്ങള്‍ക്കുണ്ടാകുന്ന പ്രശ്‌നങ്ങളില്‍ ഇടപെടുന്നതിന് പഞ്ചായത്ത് ഒരുപാട് പിന്നിലാണെന്നാണ് നാട്ടുകാരും പ്രതിപക്ഷമായ കോണ്‍ഗ്രസും പറയുന്നത്.
മുന്നണിയ്ക്കകത്തെ സി.പി.ഐ - സി.പി.എം തര്‍ക്കം നാളുകളായി ഭരണത്തെ ബാധിക്കുകയും ചെയ്തിട്ടുണ്ട്.
നിലവില്‍ സി.പി.ഐയുടെ പ്രസിഡന്റാണ് പഞ്ചായത്ത് ഭരിക്കുന്നത്. അവരുടെ കാലാവധി ഏതാണ്ട് തീരാറായി. ഇനി മൂന്നു വര്‍ഷം സി.പി.എമ്മിനാണ് പ്രസിഡന്റ് പദവി. തെരുവുനായശല്യമടക്കമുള്ള കാര്യങ്ങള്‍ നേരെയാകാന്‍ ഇനി പുതിയ പ്രസിഡന്റ് വരുന്നതുവരെ കാത്തിരിക്കുകയേ നിവൃത്തിയുള്ളൂ എന്നതാണ് സ്ഥിതി.