ദമാം: വിസ തട്ടിപ്പില്‍ കുടുങ്ങിയ മലയാളി വനിതയും ഹൈദരാബാദ് സ്വദേശിനിയും നാട്ടിലേക്ക് മടങ്ങി. സാമൂഹ്യ പ്രവര്‍ത്തകരുടെ സഹായത്തോടെയാണ് നാട്ടിലേക്ക് തിരിച്ചത്. കൊല്ലം സ്വദേശിനിയായ ജോഷ്‌ന, ഹൈദരാബാദ് സ്വദേശിനിയായ മാര്‍ത്തമ്മ എന്നിവരാണ് ദമാം വിമാനത്താവളം വഴി നാട്ടിലേക്ക് മടങ്ങിയത്.
കൊല്ലം സ്വദേശിനിയായ ജോഷ്‌നക്ക് ബ്യുട്ടീഷന്‍ കോഴ്‌സിന് ശേഷം നാട്ടിലെ ഒരു ബ്യുട്ടിപാര്‍ലറില്‍ ജോലി ചെയ്തു വരുന്നതിനിടയിലാണ് ദമാമിലേക്ക് വിസ ലഭിച്ചത്.
ട്രാവല്‍ ഏജന്റ് നല്‍കിയ വാഗ്ദാനത്തില്‍ വിശ്വസിച്ച് നാല് മാസങ്ങള്‍ക്ക് മുന്‍പാണ് ജോഷ്‌ന ഇവിടെയെത്തിയത്. എന്നാല്‍ ദമാമിലെ ഒരു സ്വദേശിയുടെ വീട്ടില്‍ വീട്ടുജോലിയാണ് ലഭിച്ചത്. ഇവിടെ എത്തിയ ശേഷമാണ് വിസ തട്ടിപ്പ് മനസ്സിലാക്കിയത്.
ഒരു മാസത്തിനു ശേഷം പുറത്ത് കടന്ന ഇവര്‍ ഇന്ത്യന്‍ എംബസി ഹെല്‍പ്‌ഡെസ്‌ക്കില്‍ അഭയം തേടുകയായിരുന്നു. അവിടെ നിന്ന് ഇവരെ വനിത അഭയ കേന്ദ്രത്തില്‍ എത്തിക്കുകയായിരുന്നു.
ഹൈദരാബാദ് സ്വദേശിനിയായ മാര്‍ത്തമ്മ കുവൈത്തിലേക്കാണ് വിസയില്‍ എത്തിയത്. എന്നാല്‍ അവിടെ നിന്നു ദമാമിലേക്ക് കടത്തിയ ഇവരെ മറ്റൊരു സ്വദേശിയ്ക്ക് വില്‍ക്കാന്‍ ശ്രമം നടന്നപ്പോള്‍ അവിടെനിന്ന് രക്ഷപ്പെട്ട് ഇന്ത്യന്‍ എംബസി ഹെല്‍പ്‌ഡെസ്‌കില്‍ അഭയം തേടുകയായിരുന്നു.