കൊച്ചി: പൊതുമേഖല കണ്‍സള്‍ട്ടന്‍സി സ്ഥാപനമായ കിറ്റ്‌കോ 45ാം വാര്‍ഷികം പ്രമാണിച്ച് എം.എസ്.എം.ഇ രംഗത്തെ പ്രവര്‍ത്തനങ്ങള്‍ ഊര്‍ജിതപ്പെടുത്തുവാന്‍ കര്‍മപദ്ധതിക്ക് രൂപം നല്‍കുന്നു. എം.എസ്.എം.ഇ ഹാന്‍ഡ് ഹോള്‍ഡിങ് സര്‍വിസ് എന്ന പദ്ധതിയുടെ ഉദ്ഘാടനം നാളെ വ്യവസായ മന്ത്രി എ.സി. മൊയ്തീന്‍ നിര്‍വഹിക്കുമെന്ന് കിറ്റ്‌കോ മാനേജിങ് ഡയറക്ടര്‍ സിറിയക് ഡേവിസ് വാര്‍ത്താസമ്മേളനത്തില്‍ അറിയിച്ചു.
എം.എസ്.എം.ഇ സ്ഥാപനങ്ങള്‍ നേരിടുന്ന മൂന്നുപ്രശ്‌നങ്ങളില്‍ ശ്രദ്ധ കേന്ദ്രീകരിക്കാനാണ് കര്‍മപദ്ധതിയിലൂടെ കിറ്റ്‌കോ ലക്ഷ്യമിടുന്നത്. നല്ല രീതിയില്‍ വിപണി സാന്നിദ്ധ്യമുള്ള യൂനിറ്റുകള്‍ക്ക് അവരുടെ പരമ്പരാഗതമായ വിപണിക്ക് പുറത്തെ വിശാലമായ വിപണിയില്‍ മത്സരിക്കാനുള്ള ക്ഷമത വര്‍ധിപ്പിക്കാനായി സാങ്കേതിക മേന്‍മയുള്ള ഉല്‍പന്നങ്ങള്‍ വിലക്കുറവില്‍ വിപണിയിലെത്തിക്കാന്‍ സ്ഥാപനങ്ങളെ കിറ്റ്‌കോ സഹായിക്കും. കമ്പനികളുടെ സംരംഭങ്ങളുടെ പ്രവര്‍ത്തനങ്ങളില്‍ വരുത്തേണ്ട ഗുണപരമായ മാറ്റങ്ങള്‍ നിര്‍ദേശിക്കാനും അത് നടപ്പില്‍ വരുത്തുന്നതിലെ കൃത്യത മനസ്സിലാക്കാനുമായി ഒരു നിശ്ചിത കാലം കിറ്റ്‌കോ അത്തരം സംരംഭങ്ങളുടെ കൂടെ പ്രവര്‍ത്തിക്കുകയും ചെയ്യുമെന്നും സിറിയക് ഡേവിസ് പറഞ്ഞു.
കിറ്റ്‌കോ ജനറല്‍ മാനേജര്‍ രഞ്ജിത് ഡൊമിനിക്ക്, സീനിയര്‍ കണ്‍സള്‍ട്ടന്റ് സജിത്കുമാര്‍ ഇ.വി. എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.