കോഴിക്കോട്: സമസ്തയുടെ എല്ലാ ഘടകങ്ങളേയും പങ്കെടുപ്പിച്ച് സുന്നി യുവജന സംഘത്തിന്റെ ആഭിമുഖ്യത്തില്‍ ശരീഅത്ത് സംരക്ഷണ സമ്മേളനം സെപ്റ്റംബര്‍ 23 ന് കോഴിക്കോട് നടക്കും. ഭരണഘടന ഉറപ്പു വരുത്തുന്ന മതസ്വാതന്ത്ര്യത്തിന്റേയും വ്യക്തി ജീവിത സംരക്ഷണത്തിന്റെയും പാരമ്പര്യത്തെ നിരാകരിച്ചുകൊണ്ടുള്ള സുപ്രിം കോടതിയുടെ മുത്വലാഖ് നിരോധന വിധിയുടെ പശ്ചാത്തലത്തില്‍ തെറ്റിദ്ധാരണകള്‍ ദുരീകരിക്കാനും തുടര്‍ നീക്കങ്ങളെ സംബന്ധിച്ച് വ്യക്തത വരുത്താനുമായാണ് യോഗം.
എസ്.എം.എഫ്, എസ്.വൈ.എസ്, എസ്.കെ.എസ്.എസ്.എഫ്, ജംഇയ്യത്തുല്‍ മുഅല്ലിമീന്‍, ജംഇയ്യത്തുല്‍ ഖുത്വബാ, ജംഇയ്യത്തുല്‍ മുദരിസീന്‍, മദ്‌റസാ മാനേജ്‌മെന്റ് അസോസിയേഷന്‍, എംപ്ലോയിസ് അസോസിയേഷന്‍, ലീഗല്‍ സെല്‍ എന്നീ ഘടകങ്ങളുടെ സംസ്ഥാന കൗണ്‍സിലര്‍മാരാണ് സമ്മേളനത്തില്‍ സംഗമിക്കുന്നത്. സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങളുടെ അധ്യക്ഷതയില്‍ സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും.
വിവാഹം, വിവാഹമോചനം എന്ന വിഷയം എം.ടി.അബ്ദുല്ല മുസ്‌ലിയാരും പ്രബോധനത്തിന്റെ അതിര് എന്ന വിഷയം അബ്ദുല്‍ ഹമീദ് ഫൈസി അമ്പലക്കടവും അവതരിപ്പിക്കും. ശരീഅത്ത് സംരക്ഷണം വിശ്വാസിയുടെ ബാധ്യത എന്ന വിഷയത്തില്‍ അബ്ദുസ്സമദ് പൂക്കോട്ടൂര്‍ സംസാരിക്കും. ശരീഅത്തും ഭരണഘടനയും എന്ന വിഷയം ഓണമ്പിള്ളി മുഹമ്മദ് ഫൈസിയും അവതരിപ്പിക്കും.
സംഘാടക സമിതി യോഗത്തില്‍ ചെയര്‍മാന്‍ ഉമര്‍ ഫൈസി മുക്കം അധ്യക്ഷനായി. എം.ടി.അബദുല്ല മുസ്‌ലിയാര്‍ ഉദ്ഘാടനം ചെയ്തു.