കോഴിക്കോട്: വ്യാജ വാര്‍ത്തകള്‍ പ്രചരിപ്പിച്ച് പോപുലര്‍ ഫ്രണ്ട് ഓഫ് ഇന്ത്യയുടെ പ്രവര്‍ത്തനങ്ങള്‍ തടയാന്‍ നീക്കങ്ങള്‍ നടത്തുന്നതിനെതിരേ അഖിലേന്ത്യാ തലത്തില്‍ സമ്മേളനങ്ങള്‍ നടത്തുമെന്ന് നേതാക്കള്‍.
നാഷനല്‍ ഇന്‍വെസ്റ്റിഗേഷന്‍ ഏജന്‍സി ആഭ്യന്തര വകുപ്പിന് സമര്‍പ്പിച്ചുവെന്ന് പറയപ്പെടുന്ന റിപ്പോര്‍ട്ടിന്റെ അടിസ്ഥാനത്തില്‍ ടൈംസ് ഗ്രൂപ്പ് മാധ്യമങ്ങളാണ് പോപുലര്‍ ഫ്രണ്ടിനെതിരേയുള്ള കഥകള്‍ പ്രചരിപ്പിക്കുന്നത്. ചില തല്‍പര കക്ഷികള്‍ പടച്ചുവിടുന്ന നുണകളും അര്‍ധ സത്യങ്ങളും കോടതികളെ പോലും സ്വാധീനിക്കുന്ന അവസ്ഥയിലെത്തിയിരിക്കുകയാണ്.
എന്‍.ഐ.എയുടേതെന്ന് പറയപ്പെടുന്ന റിപ്പോര്‍ട്ടില്‍ ഉദ്ധരിച്ച നാല് കാര്യങ്ങളിലും സംഘടനയ്ക്ക് ബന്ധമില്ല. ഇറാഖിലും സിറിയയിലും പ്രവര്‍ത്തിക്കുന്ന ഇസ്‌ലാമിക് സ്റ്റേറ്റിലേക്ക് പോപുലര്‍ ഫ്രണ്ടിന്റെ പ്രവര്‍ത്തകരെ റിക്രൂട്ട് ചെയ്യുന്നുവെന്ന ആരോപണവും സത്യമല്ല.
ഇസ്‌ലാം മതം സ്വീകരിച്ച വൈക്കത്തെ ഹാദിയ എന്ന യുവതിയെ സത്യസരണിയില്‍ ഇസ്‌ലാമിക വിദ്യാഭ്യാസത്തിനു പ്രവേശിപ്പിക്കണമെന്ന് ഹൈക്കോടതി ഡിവിഷന്‍ ബെഞ്ച് തന്നെ ഉത്തരവിട്ടതാണ്. അതേ കോടതിയാണ് ഹാദിയയുടെ ഇഷ്ടപ്രകാരം നാഷനല്‍ വിമന്‍സ് ഫ്രണ്ട് അഖിലേന്ത്യാ അധ്യക്ഷ എ.എസ്. സൈനബയെ ലോക്കല്‍ ഗാര്‍ഡിയനാക്കി നിശ്ചയിച്ചത്.
സത്യസരണി ഒരു മതംമാറ്റ കേന്ദ്രമല്ല, മതവിദ്യാഭ്യാസ കേന്ദ്രമാണെന്നും നേതാക്കള്‍ പറഞ്ഞു. വാര്‍ത്താസമ്മേളനത്തില്‍ അഖിലേന്ത്യാ ചെയര്‍മാന്‍ ഇ.അബൂബക്കര്‍, സംസ്ഥാന പ്രസിഡന്റ് നാസറുദ്ദീന്‍ എളമരം പങ്കെടുത്തു.