പെരുമ്പാവൂര്‍: മുടക്കുഴ ഗ്രാമപഞ്ചായത്തില്‍ മൃഗസംരക്ഷണ വകുപ്പിന്റെ ആഭിമുഖ്യത്തില്‍ മുടക്കുഴ യു.പി സ്‌കൂളില്‍ മുട്ടക്കോഴി വിതരണം നടത്തി. സ്‌കൂളിലെ മുഴുവന്‍ കുട്ടികള്‍ക്കും അഞ്ച് കോഴിയും തീറ്റയും, മരുന്നും അടക്കം 750 രൂപ വരുന്ന പദ്ധതിയാണ് നടപ്പിലാക്കിയത്. സ്‌കൂള്‍ കുട്ടികള്‍ക്ക് ഭക്ഷ്യസുരക്ഷ ഉറപ്പ് വരുത്തുന്നതിന്റെ ഭാഗമായാണ് പദ്ധതി. പദ്ധതിയുടെ ഉദ്ഘാടനം പഞ്ചായത്ത് പ്രസിഡന്റ് ഷൈമി വര്‍ഗ്ഗീസ് നിര്‍വഹിച്ചു.
വൈസ് പ്രസിഡന്റ് എ.റ്റി അജിത് കുമാര്‍ അധ്യക്ഷത വഹിച്ചു. ഷോജ റോയി, എല്‍സി പൗലോസ്, എസ്.നാരായണന്‍, ലിസി മത്തായി, സിനു ശശി, പി.കെ രാജു, ഡോ. കെ.പ്രസന്ന, പി.റ്റി.എ പ്രസിഡന്റ് കെ.എം രാജേഷ്, പ്രധാനധ്യാപകന്‍ എം.പി തമ്പി എന്നിവര്‍ സംസാരിച്ചു.