പൂച്ചാക്കല്‍: പള്ളിപ്പുറം പഞ്ചായത്തിലെ തിരുനല്ലൂര്‍ എസ്എന്‍ കലുങ്കിലെയും റോഡിലെയും യാത്ര ദുരിതംപൂര്‍ണം.പള്ളിപ്പുറം ഗ്രാമപഞ്ചായത്തിലെ 12, 13 വാര്‍ഡുകളുടെ അതിര്‍ത്തിയാണ് എസ്എന്‍ കലുങ്ക്.
20ല്‍പരം വര്‍ഷങ്ങളായി കലുങ്ക് നിര്‍മിച്ചിട്ട്.കലുങ്കിന്റെ കയറ്റത്തിലും ഇറക്കത്തിലുമുണ്ടായിരുന്ന ടാര്‍ മുഴുവനായും ഇല്ലാതായിരിക്കുകയാണ്.ഗ്രാവല്‍ മാത്രമാണുള്ളത്.അതില്‍ ചെളിയും അഴുക്കുമൊക്കെയാണ്.ടാര്‍ഇല്ലാതായതോടെ കയറ്റത്തിലും ഇറക്കത്തിലും കുഴികളും താഴ്ചയുമാണ്. കലുങ്ക് മുതല്‍ തിരുനല്ലൂര്‍ എസ്എന്‍ കവല വരെയുള്ള റോഡ് പൂര്‍ണമായും തകര്‍ന്നിരിക്കുകയാണ്.വിദ്യാര്‍ഥികള്‍ അടക്കം നൂറുകണക്കിനു യാത്രക്കാരും പ്രദേശവാസികളുടെ വാഹനങ്ങളും ഇതുവഴിയാണ് കടന്നുപോകുന്നത്.
വര്‍ഷങ്ങളായി ഈ ദുരിതയാത്ര തുടരുന്നെങ്കിലും നന്നാക്കാനുള്ള നടപടികള്‍ ഇനിയും ആയിട്ടില്ല.അതേസമയം റോഡും കലുങ്കും നന്നാക്കണമെന്ന് ആവശ്യപ്പെട്ട് ഗ്രാമപഞ്ചായത്ത് പൊതുമരാമത്ത് അധികൃതര്‍ക്ക് കത്ത് നല്‍കിയിട്ടുണ്ടെന്നു പള്ളിപ്പുറം പഞ്ചായത്ത് പ്രസിഡന്റ് ഷില്‍ജ സലിം പറഞ്ഞു. ജില്ലാ പഞ്ചായത്തിനോടും ആവശ്യപ്പെടുകയും അവര്‍ എസ്റ്റിമേറ്റ് എടുക്കുകയും ചെയ്തിട്ടുണ്ട്.