മട്ടാഞ്ചേരി: തോപ്പുംപടി ഫിഷറീസ് ഹാര്‍ബറില്‍ നിന്ന് മത്സ്യബന്ധനത്തിനായി പുറപ്പെട്ട ബോട്ട് കടലില്‍ മുങ്ങി. ബോട്ടിലുണ്ടായിരുന്ന പത്ത് തൊഴിലാളികളേയും മറ്റൊരു ബോട്ടില്‍ രക്ഷപ്പെടുത്തി. ശനിയാഴ്ച രാത്രി പതിനൊന്നര മണിയോടെയാണ് അപകടം. കൊച്ചി അഴിമുഖത്ത് നിന്ന് പുറം കടലില്‍ രണ്ടാം ബോയ്ക്ക് സമീപത്ത് വച്ചാണ് ബോട്ട് അപകടത്തില്‍പ്പെട്ടത്.
കുളച്ചല്‍ സ്വദേശി ഷീലന്റെ ഉടമസ്ഥതയിലുള്ള ഗാകുല്‍ദായെന്ന ഗില്‍നെറ്റ് ബോട്ടാണ് അപകടത്തില്‍പ്പെട്ടത്. കടല്‍ പ്രക്ഷുബ്ധമായിരുന്നതിനാല്‍ ശക്തമായ തിരയില്‍ ബോട്ട് മണല്‍തിട്ടയില്‍ ഇടിച്ച് കയറി പലക തകരുകയായിരുന്നു.
പലക തകര്‍ന്നതോടെ ബോട്ട് മുങ്ങി പോകുകയായിരുന്നു. അപകടത്തില്‍പ്പെട്ട ബോട്ടിലെ തൊഴിലാളികളുടെ കരച്ചില്‍ കേട്ട് ഇത് വഴി പോകുകയായിരുന്ന മറ്റൊരു മത്സ്യബന്ധന ബോട്ടെത്തി രക്ഷപ്പെടുത്തുകയായിരുന്നു. സംഭവമറിഞ്ഞ് മറൈന്‍ എന്‍ഫോഴ്‌സ്‌മെന്റ് സര്‍ക്കിള്‍ ഇന്‍സ്‌പെക്ടര്‍ ഷിബു കുമാര്‍,എസ്.ഐ രാജീവ്, എ.എസ്.ഐ അബ്ദുല്‍ റഹ്മാന്‍, സിവില്‍ പൊലിസ് ഓഫിസര്‍മാരായ ബിനോയി, മനോജ് എന്നിവരുടെ നേതൃത്വത്തിലുള്ള സംഘം തൊഴിലാളികളെ തോപ്പുംപടി ഹാര്‍ബറിലെത്തിച്ചു.
ഉടമയും ബോട്ടിന്റെ സ്രാങ്കുമായ ഷീലന്‍, തൊഴിലാളികളായ സുജിന്‍, സെല്‍വന്‍, ശരവണന്‍, മില്‍ട്ടന്‍, മില്ലന്‍, മോഹന്‍, ചന്ദ്രന്‍, വികാസ് എന്നിവരാണ് രക്ഷപ്പെട്ട തൊഴിലാളികള്‍. മുങ്ങിയ ബോട്ടിന്റെ ഭാഗങ്ങള്‍ തിരയിലകപ്പെട്ട് ഇന്നലെ ഉച്ചയ്ക്ക് കഴുപ്പിള്ളി കടല്‍ തീരത്തടിഞ്ഞു.ഏകദേശം പതിനഞ്ച് ലക്ഷം രൂപയുടെ നഷ്ടം കണക്കാക്കുന്നുണ്ട്.