കണ്ണൂര്‍: കണ്ണൂര്‍ കലക്ടറേറ്റില്‍ കള്ളന്റെ വിളയാട്ടം. ജില്ലാ കലക്ടറുടെ ഓഫിസും പൊലിസ് രഹസ്യാന്വേഷണ വിഭാഗവും പ്രവര്‍ത്തിക്കുന്ന കലക്ടറേറ്റില്‍'രഹസ്യ'മായി മോഷ്ടാവെത്തിയത് സുരക്ഷാകാമറയ്ക്കു പോലും കണ്ടുപിടിക്കാനായില്ല. നിരവധി ഓഫിസുകളില്‍ കയറി ഇറങ്ങിയ കള്ളന്‍ മേശവലിപ്പില്‍ നിന്ന് 21,500 രൂപയുമെടുത്താണ് മടങ്ങിയത്. സുരക്ഷിതമെന്നു കരുതിയ കലക്ടറേറ്റില്‍ നടന്ന കള്ളന്റെ വിളയാട്ടം അധികൃതരെ ഞെട്ടിച്ചു. പൊലിസിന് നാണക്കേടുമായി.
കലക്ടറുടെ ഓഫിസിന് താഴത്തെ നിലയില്‍ പ്രവര്‍ത്തിക്കുന്ന ഭാഗ്യക്കുറി ക്ഷേമനിധി ഓഫിസിലും ഗ്രാമവികസന ഓഫിസിലും ദാരിദ്ര്യലഘൂകരണ വിഭാഗം ഓഫിസിലും പിറകുവശത്തുള്ള കാന്റീനിലും കള്ളന്‍ കയറി. കാന്റീനിലെ മേശവലിപ്പില്‍ ഉണ്ടായിരുന്ന 20,000 രൂപയോളം കവര്‍ന്നിട്ടുണ്ട്. ജനല്‍കമ്പി മുറിച്ചാണ് അകത്തു കടന്നത്. നിര്‍മാല്യം സ്വയം സഹായ സംഘമാണ് കാന്റീന്‍ നടത്തുന്നത്. സെക്രട്ടറി ജയയുടെ പരാതിയില്‍ പൊലിസ് കേസെടുത്തു.
ദാരിദ്ര്യ ലഘൂകരണ വിഭാഗം ഓഫിസിലെ കംപ്യൂട്ടര്‍ റൂമിന്റെ പൂട്ട് തകര്‍ത്തിട്ടുണ്ട്. ഗ്രാമവികസന വകുപ്പില്‍ കയറിയ കള്ളന്‍ ഫയലുകളും മറ്റുപകരണങ്ങളും വാരിവലിച്ചിട്ടു. ലോട്ടറി തൊഴിലാളി ക്ഷേമനിധി ബോര്‍ഡ് ഓഫിസില്‍ നിന്ന് 1500 രൂപയും മോഷണം പോയിട്ടുണ്ട്. മോഷണവാര്‍ത്തയറിഞ്ഞ് പൊലിസ് സ്ഥലത്തെത്തി അന്വേഷണം ആരംഭിച്ചു. വിരലടയാള വിദഗ്ധരും സ്ഥലത്തെത്തി.പൊലിസ് സി.സി.ടി.വി ദൃശ്യങ്ങള്‍ പരിശോധിക്കുന്നുണ്ട്. തെളിവെടുപ്പും മറ്റും കഴിയുന്നതുവരെ ജീവനക്കാര്‍ക്കോ വിവിധ ആവശ്യങ്ങള്‍ക്കായി കലക്ടറേറ്റില്‍ എത്തിയവര്‍ക്കോ അകത്തു കടക്കാന്‍ കഴിഞ്ഞില്ല.