നീലേശ്വരം: ദേശീയപാതയിലെ പള്ളിക്കരയില്‍ റെയില്‍വേ മേല്‍പാലത്തിന്റെ നിര്‍മാണം ഉടന്‍ ആരംഭിക്കണമെന്നാവശ്യപ്പെട്ട് പി. കരുണാകരന്‍ എം.പിയുടെ നേതൃത്വത്തില്‍ ആരംഭിച്ച അനിശ്ചിതകാല സത്യാഗ്രഹം ഒരു സര്‍ക്കാരിനും എതിരല്ലെന്നു സി.പി.എം കേന്ദ്ര കമ്മിറ്റി അംഗവും എം.പിയുമായ പി.കെ ശ്രീമതി. നിര്‍ദിഷ്ട മേല്‍പാലം പരിസരത്താരംഭിച്ച സത്യാഗ്രഹം ഉദ്ഘാടനം ചെയ്യുകയായിരുന്നു അവര്‍. കേന്ദ്ര സര്‍ക്കാര്‍ പ്രശ്‌നത്തോട് അനുകൂല നിലപാടാണ് സ്വീകരിച്ചു വരുന്നത്. ഈ ആവശ്യം ഉന്നയിച്ച് കേരളത്തിലെ ഇടതുപക്ഷ എം.പിമാര്‍ പി. കരുണാകരന്റെ നേതൃത്വത്തില്‍ കേന്ദ്ര മന്ത്രി നിധിന്‍ ഗഡ്കരിയെ കണ്ടപ്പോഴും പ്രശ്‌നത്തിന് ഉടന്‍ പരിഹാരം കാണുമെന്ന ഉറപ്പു നല്‍കിയതാണ്. എന്നാല്‍ ദേശീയപാത വികസന കാര്യത്തില്‍ ഉദ്യോഗസ്ഥ തലത്തിലുണ്ടായ സാങ്കേതിക തടസമാണ് ഇപ്പോഴത്തെ പ്രശ്‌നങ്ങള്‍ക്കു കാരണം. അതുകൊണ്ടുതന്നെ തടസങ്ങള്‍ നീക്കാനുള്ള നടപടിയാണ് ഉണ്ടാകേണ്ടതെന്നും അവര്‍ പറഞ്ഞു. ജീവന്‍ രക്ഷിക്കാന്‍ ഓടുന്ന ആംബുലന്‍സിനു പോലും തടസമാകുന്ന പള്ളിക്കര ഗേറ്റ് മാറ്റി മേല്‍പാലം പണിയേണ്ടത് അത്യാവശ്യമാണ്. ഈ വിഷയവുമായി ബന്ധപ്പെട്ട് മുഖ്യമന്ത്രിയുടെ നിര്‍ദേശപ്രകാരം ദേശീയപാതാ വിഭാഗം എന്‍ജിനിയര്‍ പ്രഭാകരന്‍ ദില്ലിയില്‍ എത്തിയിട്ടുണ്ട്. ഉടന്‍ പരിഹാരമുണ്ടാകുമെന്നാണ് പ്രതീക്ഷയെന്നും അവര്‍ കൂട്ടിച്ചേര്‍ത്തു.