വാഷിങ്ടണ്‍: അമേരിക്കന്‍ പ്രസിഡന്റ് ഡൊണാള്‍ഡ് ട്രംപിനെ പട്ടിയോട് ഉപമിച്ച് ഉത്തരകൊറിയ രംഗത്ത്. ഉത്തരകൊറിയയെ തുടച്ചുനീക്കുമെന്ന ട്രംപിന്റെ പ്രസ്താവനയോടു പ്രതികരിക്കവേയാണ് ഉത്തരകൊറിയന്‍ വിദേശകാര്യ മന്ത്രി റി യോങ് ഹോ ട്രംപിന്റെ സംസാരം പട്ടി കുരയ്ക്കുന്നതുപോലെയാണെന്ന് പറഞ്ഞത്.
യു.എന്‍ ജനറല്‍ അസംബ്ലിയില്‍ പങ്കെടുക്കുന്നതിനായി ഉത്തര കൊറിയന്‍ വിദേശകാര്യ മന്ത്രി ബുധനാഴ്ചയാണ് അമേരിക്കയിലെത്തിയത്. നേരത്തേ പൊതുസഭയില്‍ ഉത്തരകൊറിയയുടെ ആണവപരീക്ഷണത്തെ കുറിച്ചു സംസാരിക്കവേ, ആക്രമണത്തിനു മുതിര്‍ന്നാല്‍ ആ രാജ്യത്തെ തുടച്ചുനീക്കുമെന്നു ട്രംപ് പ്രസ്താവിച്ചിരുന്നു. ഇതിനിടെ ജനറല്‍ അസംബ്ലിയില്‍ പങ്കെടുക്കുന്നതിന് ഇവിടെയെത്തിയ ഉത്തരകൊറിയന്‍ വിദേശകാര്യ മന്ത്രിയോടു മാധ്യമപ്രവര്‍ത്തകര്‍ പ്രതികരണമാരാഞ്ഞു. തുടര്‍ന്നായിരുന്നു റി യോങ് ഹോയുടെ 'പട്ടി' പ്രയോഗം. പട്ടിയുടെ കുരപോലെയാണ് ട്രംപിന്റെ പ്രസ്താവനയെന്നുപറഞ്ഞ അദ്ദേഹം, തങ്ങളുടെ രാജ്യത്തെ ഇല്ലായ്മ ചെയ്യാമെന്നതു നായയുടെ സ്വപ്‌നം പോലെയാണെന്നും പരിഹസിച്ചു.