കോഴിക്കോട്: വീട്ടുതടങ്കലിലുള്ള ഹാദിയക്കയച്ച കത്ത് നിരസിച്ചതിനെതിരേ നല്‍കിയ പരാതിയില്‍ തപാല്‍ വകുപ്പിന്റെ വിശദീകരണം വിവാദമാകുന്നു. ഹാദിയക്ക് നേരിട്ട് അയച്ച രജിസ്‌ട്രേഡ് കത്തുകള്‍ 'രക്ഷിതാവ് നിരസിച്ചു' എന്ന പേരില്‍ തിരിച്ചയച്ച നടപടിയെ ചോദ്യംചെയ്ത് എസ്.ഐ.ഒ സംസ്ഥാന പ്രസിഡന്റ് സി.ടി സുഹൈബ് നല്‍കിയ പരാതിയില്‍ തപാല്‍ വകുപ്പിന്റെ വിശദീകരണമാണ് വിവാദമായത്. രജിസ്‌ട്രേഡ് പോസ്റ്റായി അയച്ച കത്തുകള്‍ വ്യക്തി സ്ഥലത്തുണ്ടായിരിക്കേ മറ്റൊരാള്‍ക്ക് നിരസിക്കാനും തിരിച്ചയക്കാനുമുള്ള അധികാരമില്ല. ഈ നിയമത്തെയാണ് തപാല്‍ വകുപ്പിലെ ചില ഉദ്യോഗസ്ഥര്‍ അട്ടിമറിച്ചെന്നായിരുന്നു പരാതിയില്‍ ഉന്നയിച്ചത്.
എന്നാല്‍ വിശദീകരണം എന്ന നിലയില്‍ നല്‍കിയ മറുപടിയില്‍ ഹാദിയ പൊലിസ് സംരക്ഷണയിലാണെന്നും അതിനാലാണു കത്ത് പിതാവിന് കൈമാറിയതെന്നും നേരിട്ടു നല്‍കാന്‍ കഴിയില്ലെന്നുമുള്ള വിചിത്ര വാദമാണുള്ളത്. പ്രായപൂര്‍ത്തിയായ വ്യക്തിയുടെ അവകാശങ്ങള്‍ പൂര്‍ണമായും നിരസിക്കാനുള്ള അധികാരം രക്ഷകര്‍ത്താവിന് കോടതി നല്‍കിയിട്ടില്ലെന്നിരിക്കെ പൊലിസ് സംരക്ഷണമെന്ന പേരുപറഞ്ഞ് മൗലികാവകാശങ്ങള്‍ നിഷേധിക്കുകയാണു പൊലിസും സംഘ്പരിവാറും ചെയ്യുന്നതെന്നു സി.ടി.സുഹൈബ് പറഞ്ഞു.