തിരുവനന്തപുരം: സോളാര്‍ കേസില്‍ കൈക്കൂലി പണമായി സ്വീകരിച്ചതു കൂടാതെ സരിത എസ്. നായരില്‍നിന്ന് ലൈംഗിക സംതൃപ്തി നേടിയതിനെയും അഴിമതി നിരോധന നിയമം ഏഴാം വകുപ്പനുസരിച്ച് കൈക്കൂലിയായി കണക്കാക്കാമെന്ന് അന്വേഷണ കമ്മിഷന്‍ കണ്ടെണ്ടത്തിയിട്ടുണ്ടെന്ന് മുഖ്യമന്ത്രി പിണറായി വിജയന്‍ അറിയിച്ചു.
അതിനാല്‍ സരിതയുടെ 2013 ജൂലൈ 19ലെ കത്തില്‍ പരാമര്‍ശിച്ചിരിക്കുന്ന വ്യക്തികള്‍ക്കെതിരേ അഴിമതി നിരോധന നിയമപ്രകാരം കേസെടുത്ത് അന്വേഷണം നടത്താമെന്നാണ് സര്‍ക്കാരിനു ലഭിച്ച നിയമോപദേശം.
കത്തില്‍ പരാമര്‍ശിക്കപ്പെട്ടിട്ടുള്ള വ്യക്തികള്‍ സരിത നായരുമായും അവരുടെ അഡ്വക്കറ്റുമായും ഫോണില്‍ ബന്ധപ്പെട്ടതിനുള്ള തെളിവുകള്‍ കമ്മിഷനു ലഭിച്ചിട്ടുണ്ട്.
കമ്മിഷന്‍ മുന്‍പാകെ ഹാജരാക്കിയ മൊഴികളുടെയും രേഖകളുടെയും അടിസ്ഥാനത്തില്‍ സരിതക്കെതിരേ ലൈംഗിക പീഡനവും ബലാത്സംഗവും നടന്നതായി തെളിഞ്ഞിട്ടുമുണ്ട്.