ദോഹ. ഇന്ത്യന്‍ എംബസ്സിയുടെ പിന്തുണയോടെ ആര്‍.എസ്.എസ് നേതാവായിരുന്ന ദീന്‍ ദയാല്‍ ഉപാധ്യായയുടെ ജന്മദിനം കൊണ്ടാടിയതിനെ അപലപിച്ച് ഇന്‍കാസ്. (കോണ്‍ഗ്രസുമായി ബന്ധമുള്ള സംഘടനയാണ് ഇന്‍കാസ്).

ജീവിതായോധനത്തിനായി ഗള്‍ഫുരാജ്യത്തെത്തിയ ആയിരക്കണക്കിന് ഭാരതീയരുടെ സുരക്ഷാ ഉറപ്പാക്കേണ്ടവര്‍ വര്‍ഗീയ ഫാസിസ്റ്റ് ശക്തികള്‍ക്ക് വേദി ഒരുക്കിക്കൊടുക്കുന്നത് ആശങ്കാജനകവും അപലപനീയവുമാണെന്ന് ഇന്‍കാസ് ഖത്തര്‍ കമ്മിറ്റി അഭിപ്രായപ്പെട്ടു. ലോകമെമ്പാടുമുള്ള ഭാരതീയര്‍ അഭിമാനത്തോടെയും ആദരവോടെയും ഓര്‍ക്കുന്ന ഏക പേര് മഹാത്മാ ഗാന്ധിജിയുടേതാണ് .അദ്ദേഹത്തിന്റെ വധത്തിന്റെ പിന്നില്‍ പ്രവര്‍ത്തിച്ച സംഘടനയാണെന്ന് ലോകം മുഴുവന്‍ വിശ്വസിക്കുന്ന ആര്‍ എസ് എസ്സിന്റെ നേതാവിന്റെ ജന്മദിനം കൊണ്ടാടാന്‍ ഇന്ത്യന്‍ എംബസ്സി പോലെയുള്ള ഒരു മഹത്തായ സ്ഥാപനം ഒത്താശ ചെയ്തു കൊടുത്തത് ഏതൊരു ഭാരതീയനേയും വേദനിപ്പിക്കുന്ന കാര്യമാണെന്നും സംഘടനാ പ്രതിനിധികള്‍ പറഞ്ഞു.

ഖത്തറിലെ മറ്റു നിരവധി സംഘടനകളും ഈ സംഭവത്തില്‍ പ്രതിഷേധിച്ചിട്ടുണ്ട് .