ന്യൂഡല്‍ഹി: നോട്ടുനിരോധനം ദേശീയ ദുരന്തമാണെന്ന് കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി. നോട്ടുനിരോധനം പ്രഖ്യാപിച്ച നവംബര്‍ എട്ട് ദുഃഖദിനമാണെന്നും അദ്ദേഹം വ്യക്തമാക്കി.
നവംബര്‍ എട്ട് കള്ളപ്പണ വിരുദ്ധദിനമായി ആചരിക്കാനാണ് ബി.ജെ.പി തയാറെടുക്കുന്നത്. ഇത് ഇത്രമാത്രം ആഘോഷമാക്കാന്‍ എന്തുകാര്യമാണുള്ളതെന്നും രാഹുല്‍ ഗാന്ധി ചോദിക്കുന്നു. പാര്‍ട്ടി ജനറല്‍ സെക്രട്ടറിമാരുടെയും സംസ്ഥാന അധ്യക്ഷന്‍മാരുടെയും യോഗത്തില്‍ പങ്കെടുത്ത ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
രാജ്യത്തെ ജനങ്ങളുടെ പ്രത്യേകിച്ചും തൊഴിലാളികളുടെയും പാവങ്ങളുടെയും വികാരങ്ങളെന്താണെന്ന് മനസിലാക്കാന്‍ പ്രധാനമന്ത്രിക്ക് കഴിയുന്നില്ല. നോട്ടുനിരോധനത്തെ തുടര്‍ന്ന് പാവങ്ങള്‍ അനുഭവിച്ച പ്രയാസങ്ങളും വേദനയും എത്രമാത്രമുണ്ടായിരുന്നുവെന്ന് തിരിച്ചറിയാന്‍ മോദിക്ക് കഴിയില്ല. സത്യം അംഗീകരിക്കാന്‍ ഇപ്പോഴും അദ്ദേഹം തയാറാകുന്നില്ല.
ജി.എസ്.ടി നല്ലൊരു പദ്ധതിയാണ്. എന്നാല്‍ അത് ധൃതിപിടിച്ച് നടപ്പാക്കി അതിന്റെ മൂല്യം ചോര്‍ത്തിക്കളയുകയാണ് ചെയ്തത്. നോട്ട് അസാധുവാക്കലിന്റെ വാര്‍ഷികം കരിദിനമായി ആചരിക്കാനാണ് കോണ്‍ഗ്രസ് തീരുമാനിച്ചിരിക്കുന്നത്.