തിരൂരങ്ങാടി: ദാറുല്‍ഹുദാ ഇസ്‌ലാമിക് സര്‍വകലാശാലയുടെ അസം ഓഫ് കാംപസില്‍ നിര്‍മാണം പൂര്‍ത്തിയാക്കിയ സയ്യിദ് മുഹമ്മദലി ശിഹാബ് തങ്ങളുടെ നാമധേയത്തിലുള്ള സെക്കന്‍ഡറി ബില്‍ഡിങ്ങിന്റെ ഉദ്ഘാടനം നാളെ നടക്കും. ദാറുല്‍ഹുദാ ചാന്‍സലര്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം നിര്‍വഹിക്കും. ദാറുല്‍ഹുദാ വി.സി ഡോ. ബഹാഉദ്ദീന്‍ മുഹമ്മദ് നദ്‌വി അധ്യക്ഷനാകും.
കാംപസില്‍ നിര്‍മിച്ച സൈനുല്‍ ഉലമാ മെമ്മോറിയല്‍ ലൈബ്രറി വി.സി ഉദ്ഘാടനം ചെയ്യും. സ്മാര്‍ട്ട് റൂമിന്റെ ഉദ്ഘാടനം ദാറുല്‍ഹുദാ വൈസ് പ്രസിഡന്റ് സയ്യിദ് മുഹമ്മദ് കോയ തങ്ങള്‍ ജമലുല്ലൈലി നിര്‍വഹിക്കും. ഓഡിറ്റോറിയം ഇ.ടി മുഹമ്മദ് ബഷീര്‍ എം.പിയും കംപ്യൂട്ടര്‍ ലാബ് പി.വി അബ്ദുല്‍ വഹാബ് എം.പിയും ഉദ്ഘാടനം ചെയ്യും. അസം എം.എല്‍.എമാരായ ജാകിര്‍ ഹുസൈന്‍, വാജിദ് അലി, അബ്ദുല്‍ ഖാലിഖ്, മുന്‍ മന്ത്രിമാരായ സിദ്ദീഖ് അഹ്മദ്, സൈദുല്ല നാങ്കോണ്‍, മുന്‍ എം.എല്‍.എ താരാ പ്രസാദ് ദാസ്, ബോഡോലാന്റ് എജ്യുക്കേഷന്‍ കൗണ്‍സില്‍ മുന്‍ മെമ്പര്‍ ദെര്‍ഹാസത് ബുസുമാട്രി, നാഷണല്‍ ഡിറ്റക്ടീവ് ബ്യൂറോയിലെ ഡോ. ഡി.എം.ബി ബറുവ, ദീപുജിത്ത് കണികാര്‍, മുന്‍ ഡി.ജി.പി കമലേശ്വര ധക്കാ തുടങ്ങിയവര്‍ പങ്കെടുക്കും.
2014ല്‍ ക്ലാസ് ആരംഭിച്ച കാംപസില്‍ അസം, മണിപ്പൂര്‍, മേഘാലയ എന്നീ സംസ്ഥാനങ്ങളില്‍ നിന്നായി 200 ലധികം വിദ്യാര്‍ഥികള്‍ പഠിക്കുന്നുണ്ട്. അസം കാംപസിനു പുറമെ വെസ്റ്റ് ബംഗാളിലും സീമാന്ധ്രയിലും കര്‍ണാടകയിലും വാഴ്‌സിറ്റിയുടെ ഓഫ് കാംപസുകള്‍ പ്രവര്‍ത്തിക്കുന്നുണ്ട്.