തിരുവനന്തപുരം: എല്ലാ വീടുകളിലും ശൗചാലയസൗകര്യം ഏര്‍പ്പെടുത്തുമെന്ന് മുഖ്യമന്ത്രി പിണറായി വിജയന്‍. സെപ്റ്റംബര്‍ മുതല്‍ ഇതിനായുള്ള നടപടിക്രമങ്ങള്‍ ആരംഭിക്കുമെന്നും അടുത്ത മാര്‍ച്ചോടെ പദ്ധതി പൂര്‍ത്തിയാക്കുമെന്നും പിണറായി വിജയന്‍ ഫേസ്ബുക്കില്‍ കുറിച്ചു. മാര്‍ച്ച് 31 കഴിയുന്നതോടെ ശൗചാലയമില്ലാത്ത വീട് കേരളത്തില്‍ ഉണ്ടാകില്ലെന്നും മുഖ്യമന്ത്രി വ്യക്തമാക്കി.
ആകെ 941 പഞ്ചായത്തുകളിലായി രണ്ടുലക്ഷം വീടുകളിലാണ് ശൗചാലയം നിര്‍മിക്കേണ്ടത്. നഗരങ്ങളില്‍ 32,000 കുടുംബങ്ങള്‍ക്ക് വ്യക്തിഗത ശൗചാലയ സൗകര്യമില്ലെന്നും മുഖ്യമന്ത്രി പറഞ്ഞു. കേരളത്തില്‍ നിലവില്‍ 96.3 ശതമാനം വീടുകളിലും ശൗചാലയങ്ങളുണ്ട്. ദേശീയ ശരാശരിയേക്കാളും രാജസ്ഥാന്‍, ഗുജറാത്ത് തുടങ്ങിയ വികസിത സംസ്ഥാനങ്ങളേക്കാളും മുന്നിലാണ് കേരളം.
സംസ്ഥാനത്തെ ഗ്രാമപ്രദേശങ്ങളിലെ പ്രവര്‍ത്തനങ്ങള്‍ പൂര്‍ത്തീകരിച്ചാലുടന്‍ നഗരപ്രദേശങ്ങളിലെ ശൗചാലയ നിര്‍മാണപ്രവര്‍ത്തനങ്ങള്‍ പൂര്‍ത്തീകരിക്കുമെന്നും മുഖ്യമന്ത്രി വ്യക്തമാക്കുന്നു.