പാലക്കാട്: മുതലമട കള്ളിയംപാറയില്‍ കാതിക്കൂടം നീറ്റ ജലാറ്റിന്‍ കമ്പനി തള്ളുന്ന രാസമാലിന്യത്തില്‍ മനുഷ്യജീവനെ ഗുരുതരമായി ബാധിക്കുന്ന രാസഖരമാലിന്യങ്ങളുടെ വലിയ സാന്നിധ്യം കണ്ടെത്തി. ജില്ലാ കലക്ടറുടെ നിര്‍ദേശപ്രകാരം ജില്ലാ കൃഷി ഓഫിസറുടെ നേതൃത്വത്തില്‍ ശേഖരിച്ച മാലിന്യം കാര്‍ഷിക സര്‍വകലാശാലയില്‍ പരിശോധന നടത്തിയപ്പോഴാണ് മെര്‍ക്കുറിയുടെ അളവ് അനുവദനീയമായതിനേക്കാള്‍ ആയിരം മടങ്ങ് കൂടുതല്‍ കണ്ടെത്തിയത്.
സിങ്ക്, ലെഡ്, കാഡ്മിഡിയം, ഇരുമ്പ്, അലൂമിനിയം, വനേഡിയം, കോബാള്‍ട്ട് എന്നിവയുടെ അളവും കൂടുതലാണ്. പതിനായിരക്കണക്കിന് ടണ്‍ മാലിന്യമാണ് കള്ളിയംപാറയില്‍ സ്വകാര്യവ്യക്തി കൃഷിയിടത്തിലെ ജലസ്രോതസിന് അരികിലായി ജൈവവളമെന്ന പേരില്‍ സൂക്ഷിച്ചിരിക്കുന്നത്.
കള്ളിയാംപാറയില്‍ കാതിക്കൂടം നീറ്റജലാറ്റിന്‍ കമ്പനി തള്ളുന്ന ഈ രാസ മാലിന്യത്തിന് നേരത്തെ അനുവദിച്ചിരുന്ന പൊലിസ് സംരക്ഷണം ഒഴിവാക്കിയ ഉത്തരവ് അടുത്തിടെ ഹൈക്കോടതി പുറപ്പെടുവിച്ചതിനു പുറകെയാണ് ഈ റിപ്പോര്‍ട്ടും പുറത്തുവന്നിരിക്കുന്നത്. മാലിന്യ നിക്ഷേപത്തിനെതിരേ ജനവികാരം ഉയര്‍ന്നവേളയില്‍ ഇവിടെ സൂക്ഷിക്കുന്നത് ജൈവവളമാണെന്ന് കോടതിയെ ധരിപ്പിച്ചാണ് പൊലിസ് സംരക്ഷണം നേടിയിരുന്നത്. ഇതാണ് ഹൈക്കോടതി പിന്‍വലിച്ചിരിക്കുന്നത്. ആശുപത്രി മാലിന്യങ്ങള്‍, കോഴി മാലിന്യങ്ങള്‍ എന്നിവക്കൊപ്പമാണ് നീറ്റജലാറ്റിന്‍ കമ്പനിയുടെ രാസമാലിന്യങ്ങളും സ്വകാര്യവ്യക്തി അപകടകരമായ രീതിയില്‍ സൂക്ഷിച്ചിരിക്കുന്നത്. മഴക്കാലത്ത് ഈ മാലിന്യം ഗായത്രി പുഴിയിലൂടെ ഭാരതപ്പുഴയില്‍ എത്തിചേരുകയാണ്. ഇത് കുടിവെള്ളത്തെ വിഷമയമാക്കുന്നതിന് പുറമെ മിനാമട്ട, കാന്‍സര്‍, ലിവര്‍സോറിസിസ്, കിഡ്‌നി തകാര്‍ രോഗങ്ങള്‍ക്കും സാധ്യതയൊരുക്കും.