തിരുവനന്തപുരം: ഇന്ത്യന്‍ സൂപ്പര്‍ ലീഗിലെ കേരളത്തിന്റെ പ്രതിനിധികളായ കേരള ബ്ലാസ്റ്റേഴ്‌സിന് പിന്തുണ തേടി ക്ലബ് പ്രധാന ഉടമകളിലൊരാളായ ക്രിക്കറ്റ് ഇതിഹാസം സച്ചിന്‍ ടെണ്ടുല്‍ക്കര്‍ മുഖ്യമന്ത്രി പിണറായി വിജയനെ കണ്ടു.
ഇന്നലെ രാവിലെ ഭാര്യ അഞ്ജലിയോടൊപ്പം മുഖ്യമന്ത്രിയുടെ ഓഫിസിലെത്തിയാണ് സച്ചിന്‍ കൂടിക്കാഴ്ച നടത്തിയത്. കേരള ബ്ലാസ്റ്റേഴ്‌സിനുള്ള പിന്തുണയ്ക്ക് പുറമെ സച്ചിന്‍ കേരളത്തില്‍ തുടങ്ങാനിരിക്കുന്ന ഫുട്‌ബോള്‍ അക്കാദമിയെക്കുറിച്ചും അദ്ദേഹം മുഖ്യമന്ത്രിയുമായി സംസാരിച്ചു. അക്കാദമിക്ക് എല്ലാവിധ പിന്തുണയും മുഖ്യമന്ത്രി വാഗ്ദാനം ചെയ്തു.
മത്സരങ്ങളില്‍ ജയിക്കുക എന്നതിലുപരി ഫുട്‌ബോള്‍ എന്ന കളി പ്രചരിപ്പിക്കുകയാണ് തന്റെ ലക്ഷ്യമെന്ന് സച്ചിന്‍ പിന്നീട് മാധ്യമങ്ങളോട് പറഞ്ഞു. കേരള ജനത ഫുട്‌ബോളിന് നല്‍കുന്ന പിന്തുണയ്ക്ക് അദ്ദേഹം നന്ദി പറഞ്ഞു. ഈ മാസം 17നാണ് ഐ.എസ്.എല്ലിന്റെ നാലാം പതിപ്പ് ആരംഭിക്കുന്നത്. കേരള ബ്ലാസ്റ്റേഴ്‌സും അമര്‍ തൊമര്‍ കൊല്‍ക്കത്ത (എ.ടി.കെ)യും തമ്മിലാണ് ആദ്യ മത്സരം. കഴിഞ്ഞ വര്‍ഷവും ബ്ലാസ്റ്റേഴ്‌സിന് പിന്തുണ തേടി സച്ചിന്‍ മുഖ്യമന്ത്രിയുമായി കൂടിക്കാഴ്ച നടത്തിയിരുന്നു.