വടക്കാഞ്ചേരി : മദ്യത്തിനും മയക്കുമരുന്നിനുമെതിരേ യെസ് ടു ഫുട്‌ബോള്‍ നോ ടു ഡ്രഗ്‌സ് എന്ന മുദ്രാവാക്യവുമായി സ്റ്റുഡന്റ് പൊലിസ് കേഡറ്റ് തൃശൂര്‍ റൂറല്‍ ജില്ലയുടെ നേതൃത്വത്തില്‍ സംഘടിപ്പിച്ച ഫുട്‌ബോള്‍ ടൂര്‍ണമെന്റില്‍ ഇരിങ്ങാലക്കുട നാഷനല്‍ ഹയര്‍ സെക്കന്‍ഡറി സ്‌കൂള്‍ ജേതാക്കള്‍ . വടക്കാഞ്ചേരി എം.ആര്‍.എസിനെ ഏകപക്ഷീയമായ രണ്ട് ഗോളുകള്‍ക്കാണ് ഇരിങ്ങാലക്കുട തകര്‍ത്തത്. ഗവണ്‍മെന്റ് ഹയര്‍ സെക്കന്ററി സ്‌കൂള്‍ എരുമപ്പെട്ടി, ഗവണ്‍മെന്റ് ഹയര്‍ സെക്കന്ററി സ്‌കൂള്‍ മച്ചാട്, ആറ്റൂര്‍ അറഫ ഇംഗ്ലീഷ് സ്‌കൂള്‍, അന്‍സാര്‍ ഇംഗ്ലീഷ് സ്‌കൂള്‍ പെരുമ്പിലാവ്, ജി.എം.എച്ച്.എസ് നടവരമ്പ് , എല്‍.എഫ്.സി.എച്ച്.എസ്.എസ് കൊരട്ടി എന്നീ ടീമുകളും വടക്കാഞ്ചേരി ബോയ്‌സ് ഹൈസ്‌കൂള്‍ ഗ്രൗണ്ടില്‍ നടന്ന മത്സരത്തില്‍ പങ്കെടുത്തു. ഡോ.എ.പി.ജെ അബ്ദുള്‍ കലാം മെമ്മോറിയല്‍ ട്രോഫിക്ക് വേണ്ടിയായിരുന്നു മത്സരങ്ങള്‍.
വടക്കാഞ്ചേരി നഗരസഭ വൈസ് ചെയര്‍മാന്‍ എം.ആര്‍ അനൂപ് കിഷോര്‍ ഉദ്ഘാടനം ചെയ്തു. വൈകിട്ട് നടന്ന സമാപന സമ്മേളനവും സമ്മാനദാനവും കൗണ്‍സിലര്‍ സിന്ധു സുബ്രഹ്മണ്യന്‍ നിര്‍വഹിച്ചു. എസ്.പി.സി ജില്ലാ നോഡല്‍ ഓഫിസര്‍ എസ്.അമ്മിണിക്കുട്ടന്‍ അധ്യക്ഷനായി. കെ വിനോദ്കുമാര്‍, സി.ഐ പി.എസ് സുരേഷ്, എസ്.ഐ കെ.സി രതീഷ്, ജയന്‍ കുണ്ടുകാട്, എം.ആര്‍ സജയന്‍ സംസാരിച്ചു.