കൊച്ചി: ഹൂപ്പത്തോണ്‍ ബാസ്‌കറ്റ് ബോള്‍ സീരിസിലെ ആദ്യ പോരാട്ടത്തില്‍ കേരളം പൊരുതി തോറ്റു. കടവന്ത്ര രാജീവ്ഗാന്ധി ഇന്‍ഡോര്‍ സ്റ്റേഡിയത്തില്‍ നടന്ന മത്സരത്തില്‍ 70-59 എന്ന സ്‌കോറിനാണ് ആസ്‌ത്രേലിയന്‍ ബിഗ്‌വി ബാസ്‌കറ്റ്‌ബോള്‍ ലീഗ് ടീമായ റിങ്‌വുഡ് ഹോക്ക്‌സ് പരാജയപ്പെടുത്തിയത്. ആദ്യ രണ്ട് ക്വാര്‍ട്ടറില്‍ മങ്ങിയ കേരള വനിതകള്‍ രണ്ട് മൂന്ന് ക്വാര്‍ട്ടറില്‍ ആസ്‌ത്രേലിയന്‍ വനികള്‍ക്കെതിരേ ശക്തമായ മുന്നേറ്റമാണ് നടത്തിയത്.
ആദ്യ ക്വാര്‍ട്ടറില്‍ 20- 11 പോയിന്റിന് കേരളം പിന്നിലായി. പോരാട്ടം ഇടവേളക്ക് പിരിയുമ്പോള്‍ സ്‌കോര്‍ 46-21. മൂന്നാം ക്വാര്‍ട്ടറില്‍ മികച്ച പ്രകടനവുമായി കേരളം തിരിച്ചുവരവ് നടത്തി. സ്‌കോര്‍ ബോര്‍ഡില്‍ 24 പോയിന്റുകള്‍ കൂട്ടിച്ചേര്‍ത്ത കേരളം സ്‌കോര്‍ 45 ല്‍ എത്തിച്ചു. അവസാന ക്വാര്‍ട്ടറില്‍ എട്ടു പോയിന്റുകള്‍ മാത്രമാണ് റിങ്‌വുഡ് ഹോക്ക്‌സിന് സ്‌കോര്‍ ചെയ്യാനായത്. 14 പോയിന്റുകള്‍ അവസാന ക്വാര്‍ട്ടറില്‍ കേരളം നേടി. കേരളത്തിനായി ക്യാപ്റ്റന്‍ പി.എസ് ജീന 20 പോയിന്റുകള്‍ സ്‌കോര്‍ ചെയ്തു. പി.ജി അഞ്ജന 19 പോയിന്റുകള്‍ നേടി. 15 പോയിന്റ് നേടിയ കാസിഡി മിഹാല്‍കോയാണ് റിങ്‌വുഡിന്റെ ടോപ് സ്‌കോററര്‍.