ചെന്നൈ: ജന്മദിനത്തില്‍ പുതിയ രാഷ്ട്രീയ പാര്‍ട്ടി പ്രഖ്യാപനമുണ്ടാവുമെന്ന് കരുതിയവരെ നിരാശരാക്കി ഉലകനായകന്‍ കമല്‍ഹാസന്‍. തല്‍ക്കാലം രാഷ്ട്രീയ പ്രവേശനം പ്രഖ്യാപിക്കുന്നില്ലെന്ന് വ്യക്തമാക്കിയ കമല്‍ഹാസന്‍, ജനങ്ങളുമായി സംവദിക്കാന്‍ പുതിയ മൊബൈല്‍ ആപ്പ് പുറത്തിറക്കി. 'മയ്യം വിസില്‍' എന്ന പേര് നല്‍കിയിരിക്കുന്ന മൊബൈല്‍ ആപ്പ് വരുന്ന ജനുവരിയോടെ പുറത്തിറങ്ങും. അഴിമതി നടക്കുമ്പോള്‍ ജനങ്ങള്‍ക്ക് സംവദിക്കാനുള്ള വേദിയാണ് തന്റെ ആപ്പെന്ന് 63ാം ജന്മദിനത്തില്‍ അദ്ദേഹം പറഞ്ഞു.

ആര്‍ക്കുവേണമെങ്കിലും എവിടെ നടക്കുന്ന തെറ്റായ കാര്യങ്ങളും ആപ്ലിക്കേഷന്‍ വഴി അറിയിക്കാം. ഇതുവഴി നീതി ലഭ്യമാക്കാമെന്നും കമല്‍ കൂട്ടിച്ചേര്‍ത്തു.

കമല്‍ഹാസന്‍ തന്റെ ജന്മദിനത്തില്‍ പുതിയ പാര്‍ട്ടി പ്രഖ്യാപിക്കുമെന്നാണ് ഏവരും പ്രതീക്ഷിച്ചിരുന്നത്. എന്നാല്‍ രാഷ്ട്രീയ പാര്‍ട്ടി പ്രഖ്യാപിക്കാന്‍ ധൃതിപ്പെടുന്നില്ലെന്നും രാഷ്ട്രീയത്തിലേക്ക് ഇറങ്ങണമെങ്കില്‍ താഴേത്തട്ടില്‍ നിന്നും ഇനിയും കാര്യങ്ങള്‍ മനസിലാക്കാനുണ്ടെന്നും അദ്ദേഹം പറഞ്ഞു. മാത്രമല്ല അധികം വൈകാതെതന്നെ പ്രഖ്യാപനമുണ്ടാകുമെന്നും കമല്‍ഹാസന്‍ അറിയിച്ചു.