കൊല്ലം: സര്‍ക്കാര്‍ സ്‌കൂളില്‍ ഉച്ചഭക്ഷണത്തിനു നല്‍കിയ അരിയില്‍ പുഴുക്കള്‍ കണ്ടെത്തി. പത്തനാപുരം പുന്നല സര്‍ക്കാര്‍ ഹയര്‍ സെക്കന്‍ഡറി സ്‌കൂളിലാണ് സംഭവം.
നാനൂറിലധികം വിദ്യാര്‍ഥികളാണ് സ്‌കൂളില്‍ നിന്നും ഉച്ചഭക്ഷണം കഴിക്കുന്നത്. കഴിഞ്ഞ രണ്ടുദിവസമായി ഭക്ഷണത്തില്‍ ദുര്‍ഗന്ധം അനുഭവപ്പെടുന്നതായി വിദ്യാര്‍ഥികള്‍ മാതാപിതാക്കളോടു പരാതി പറഞ്ഞിരുന്നു. തുടര്‍ന്നു രക്ഷിതാക്കള്‍ പി.ടി.എ പ്രതിനിധികളെ വിവരമറിയിക്കുകയും സ്‌കൂളിലെത്തി പ്രധമാധ്യാപികക്കു പരാതി നല്‍കുകയും ചെയ്തു.
തുടര്‍ന്നു അരിച്ചാക്കുകള്‍ പരിശോധിച്ചപ്പോഴായിരുന്നു അരിയില്‍ നിറയെ പുഴുക്കള്‍ ശ്രദ്ധയില്‍പ്പെട്ടത്. സംഭവത്തില്‍ പ്രതിഷേധിച്ച് പി.ടി.എയും നാട്ടുകാരും രംഗത്തെത്തി. പത്തനാപുരത്തെ മാവേലി സ്‌റ്റോറില്‍ നിന്നായിരുന്നു സ്‌കൂളിലേക്കു അരി വാങ്ങിയിരുന്നത്. സംഭവമറിഞ്ഞു പുനലൂര്‍ എ.ഇ.ഒ സ്ഥലത്തെത്തി നടപടിയെടുക്കാമെന്നു ഉറപ്പുനല്‍കി.