ബദിയടുക്ക: വാട്‌സ്ആപ് ഗ്രൂപ്പില്‍ അനുവാദമില്ലാതെ ചേര്‍ത്തതിനെ ചൊല്ലി പെര്‍ള മണിയംപാറയില്‍ ബി.ജെ.പി-സി.പി.എം സംഘര്‍ഷം. ആറുപേര്‍ക്കു പരുക്കേറ്റു. തഞ്ചാവൂര്‍ സ്വദേശിയും മണിയംപാറയിലെ ബാര്‍ബര്‍ ഷോപ്പ് നടത്തിപ്പുകാരനുമായ സുരേഷ് (26), ബി.ജെ.പി പ്രവര്‍ത്തകരായ വസന്തന്‍ (26), അരുണ്‍ രാജ് (25), ശിവപ്രസാദ് (25) എന്നിവര്‍ക്കും ഡി.വൈ.എഫ്.ഐ പ്രവര്‍ത്തകരായ മണിയംപാറ ദേരടുക്കയിലെ ജയറാം(35), സുബ്രഹ്മണ്യന്‍ (27) എന്നിവര്‍ക്കുമാണ് പരുക്കേറ്റത്.
അടുത്ത കാലത്താണ് സുരേഷ് മണിയംപാറയില്‍ ബാര്‍ബര്‍ ഷോപ്പ് തുടങ്ങിയത്. ഏതാനും ദിവസം മുമ്പ് ഡി.വൈ.എഫ്.ഐയുടെ വാട്‌സ്ആപ് ഗ്രൂപ്പിലേക്ക് സുരേഷിനെ ചേര്‍ത്തുവത്രെ. അതില്‍ നിന്നു രണ്ടു തവണ പുറത്തു പോയിട്ടും വീണ്ടും ചേര്‍ത്തു. ഇക്കാര്യമറിഞ്ഞ ബി.ജെ.പി പ്രവര്‍ത്തകര്‍ ഡി.വൈ.എഫ്.ഐ പ്രവര്‍ത്തകരെ ചോദ്യം ചെയ്യുകയായിരുന്നു. ഇതാണ് സംഘര്‍ഷത്തില്‍ കലാശിച്ചത്. അതേസമയം, തനിക്ക് രാഷ്ട്രീയമില്ലെന്ന് ബാര്‍ബര്‍ ഷോപ്പ് ജീവനക്കാരനായ സുരേഷ് പറഞ്ഞു.