ബഗ്ദാദ്: ഐ.എസ് വിരുദ്ധ പോരാട്ടത്തില്‍ വിജയം ആഘോഷിച്ച് ഇറാഖ് സൈന്യം. ആഘോഷത്തിന്റെ ഭാഗമായി ബഗ്ദാദിലെ അതീവ സുരക്ഷാ മേഖലയില്‍ സൈനിക പരേഡ് നടന്നു.
ഇറാഖ് സൈനിക വക്താവ് ആണ് ഇക്കാര്യം അറിയിച്ചത്. ഐ.എസിനെതിരായ പോരാട്ടം അവസാനിച്ചതായി കഴിഞ്ഞ ദിവസം ഇറാഖ് പ്രധാനമന്ത്രി ഹൈദര്‍ അല്‍ അബാദി പ്രഖ്യാപിച്ചിരുന്നു.പരേഡ് തത്സമയം സംപ്രേഷണം ചെയ്തിരുന്നില്ല. സര്‍ക്കാര്‍ മാധ്യമത്തിനു മാത്രമേ സ്ഥലത്തേക്കു പ്രവേശനമുണ്ടായിരുന്നുള്ളൂ. പരേഡിനു മുന്നോടിയായി ശനിയാഴ്ച ബഗ്ദാദ് നഗരത്തിനു മുകളിലൂടെ സൈനിക ഹെലികോപ്ടറുകളും വിമാനങ്ങളും പറന്നിരുന്നു. ആഘോഷങ്ങളുടെ ഭാഗമായി ഇന്നലെ ഇറാഖില്‍ ദേശീയ അവധി പ്രഖ്യാപിച്ചിരുന്നു.ഐ.എസ് നിയന്ത്രണത്തിലുണ്ടായിരുന്ന അവസാന കേന്ദ്രങ്ങളും സൈന്യം തിരിച്ചുപിടിച്ചതായി ശനിയാഴ്ച അബാദി അറിയിച്ചിരുന്നു. സിറിയന്‍ അതിര്‍ത്തി പ്രദേശങ്ങളിലാണ് ഐ.എസ് ഭീകരരുമായി അന്തിമ പോരാട്ടം നടന്നത്.