കൊച്ചി: ഓഖി ചുഴലിക്കാറ്റ് നാശംവിതച്ച ലക്ഷദ്വീപ് പ്രധാനമന്ത്രി നരേന്ദ്രമോദി സന്ദര്‍ശിച്ചു. ഇന്നലെ ഒന്‍പതോടെ അഗത്തി വിമാനത്താവളത്തിലെത്തിയ പ്രധാനമന്ത്രി 9.30ഓടെ ഹെലികോപ്റ്റര്‍ മാര്‍ഗം തലസ്ഥാന ദ്വീപായ കവരത്തിയിലെത്തി. പ്രധാനമന്ത്രിയെ ലക്ഷദ്വീപ് അഡ്മിനിസ്‌ട്രേറ്റര്‍ ഫാറൂഖ് ഖാന്‍, കലക്ടര്‍ ഡോ. താരീഖ് തോമസ്, മുഹമ്മദ് ഫൈസല്‍ എം.പി തുടങ്ങിയവര്‍ സ്വീകരിച്ചു. ഓഖി ദുരിതബാധിത പ്രദേശങ്ങള്‍ സന്ദര്‍ശിക്കുന്നതിന്റെ ഭാഗമായാണ് പ്രധാനമന്ത്രി കവരത്തിയില്‍ എത്തിയത്. തുടര്‍ന്ന് കവരത്തി സെക്രട്ടേറിയറ്റില്‍ നടന്ന രണ്ട് ഔദ്യോഗിക യോഗങ്ങളില്‍ പ്രധാനമന്ത്രി പങ്കെടുത്തു.