തിരുവനന്തപുരം: മെഡിക്കല്‍ കോളജില്‍ മെഡിക്കല്‍ സര്‍വിസസ് കോര്‍പ്പറേഷന്‍ വിതരണം ചെയ്ത മരുന്ന് കുത്തിവച്ച രോഗികള്‍ക്ക് അലര്‍ജി. ഇതേതുടര്‍ന്ന് ചികിത്സയിലായിരുന്ന അഞ്ചുപേരെ തീവ്രപരിചരണ വിഭാഗത്തില്‍ പ്രവേശിപ്പിച്ചു. മരുന്നില്‍നിന്നുള്ള അലര്‍ജിയാണെന്നു കണ്ടെത്തിയതിനെ തുടര്‍ന്ന് അടിയന്തര ചികിത്സ നല്‍കിയതിനാല്‍ മറ്റ് അപകടങ്ങള്‍ ഒഴിവാക്കാനായി.
വാര്‍ഡുകളില്‍ ചികിത്സയിലായിരുന്ന രോഗികള്‍ക്കാണ് അലര്‍ജിയുണ്ടായത്. കഴിഞ്ഞ ദിവസം രാത്രി കുത്തിവച്ച മരുന്നില്‍ നിന്ന് ഇവര്‍ക്ക് അലര്‍ജി ഉണ്ടാകുകയായിരുന്നു. സെഫറോക്‌സിം എന്ന ആന്റിബയോട്ടിക് മരുന്നില്‍ നിന്നാണ് അലര്‍ജിയുണ്ടായതെന്നാണ് സംശയം. മരുന്ന് നല്‍കിയതിനു പിന്നാലെ 15 രോഗികള്‍ക്ക് കടുത്ത ശാരീരിക അസ്വസ്ഥതകള്‍ അനുഭവപ്പെട്ടു. അതില്‍ സ്ഥിതി ഗുരുതരമായ അഞ്ചുപേരെയാണ് ഐ.സി.യുവിലേക്ക് മാറ്റിയത്.
അലര്‍ജി ഉണ്ടാക്കിയ ബാച്ച് മരുന്നുകളുടെ വിതരണം നിര്‍ത്തിവയ്ക്കാന്‍ അധികൃതര്‍ അടിയന്തര നിര്‍ദേശം നല്‍കി. മരുന്നിന്റെ ഗുണനിലവാരത്തില്‍ ഉണ്ടായ വ്യത്യാസമാണ് അലര്‍ജിക്ക് കാരണമായതെന്നാണ് നിഗമനം. അലര്‍ജിയുണ്ടാക്കിയതെന്നു സംശയിക്കുന്ന മരുന്ന് വിവേക് ഫാര്‍മസ്യൂട്ടിക്കല്‍സിന്റേതാണ്. സംഭവത്തെ തുടര്‍ന്ന് പരിശോധനകള്‍ക്കായി മരുന്നിന്റെ സാമ്പിളുകള്‍ ഡ്രഗ്‌സ് കണ്‍ട്രോള്‍ വിഭാഗവും മെഡിക്കല്‍ സര്‍വിസസ് കോര്‍പ്പറേഷനും ശേഖരിച്ചിട്ടുണ്ട്.