കനേഡിയന്‍ കുടിയേറ്റം; ആശങ്കയേറ്റി പുതിയ കണക്കുകള്‍; സ്റ്റഡി പെര്‍മിറ്റില്‍ കുത്തനെ ഇടിവ്; ഇന്ത്യന്‍ വിദ്യാര്‍ഥികള്‍ക്ക് പണികിട്ടും

ഇന്ത്യന്‍ വിദ്യാര്‍ഥികള്‍ക്ക് കാനഡ നല്‍കിയ പഠന പെര്‍മിറ്റുകളുടെ എണ്ണത്തില്‍ വന്‍ ഇടിവ് സംഭവിച്ചതായി റിപ്പോര്‍ട്ട്. കഴിഞ്ഞ വര്‍ഷം സെപ്റ്റംബര്‍ പാദത്തില്‍ 1.08 ലക്ഷം പെര്‍മിറ്റുകള്‍ അനുവദിച്ചത് ഡിസംബര്‍ പാദത്തില്‍ 14,910 ആയി ചുരുങ്ങിയെന്നാണ് കണക്കുകള്‍. ഏകദേശം 86 ശതമാനത്തിന്റെ ഇടിവാണ് നാല് മാസങ്ങള്‍ക്കിടയില്‍ സംഭവിച്ചത്.

എന്താണ് കാരണം?
ഖലിസ്ഥാന്‍ നേതാവിന്റെ കൊലപാതകവുമായി ബന്ധപ്പെട്ട അസ്വാരാസ്യങ്ങള്‍ ഇരുരാജ്യങ്ങള്‍ക്കുമിടയില്‍ നയതന്ത്ര പ്രതിസന്ധി രൂക്ഷമാക്കിയിരുന്നു. തര്‍ക്കങ്ങള്‍ മുറുകിയതോടെ പഠനാനുമതിക്കുള്ള പെര്‍മിറ്റ് പ്രോസസ് ചെയ്യുന്ന കനേഡിയന്‍ നയതന്ത്രജ്ഞരെ ഇന്ത്യ പുറത്താക്കിയിരുന്നു. ഇതിന് പിന്നാലെയാണ് കഴിഞ്ഞ വര്‍ഷം അവസാനത്തോടെ ഇന്ത്യന്‍ വവിദ്യാര്‍ഥികള്‍ക്ക് നല്‍കിയ സ്റ്റഡി പെര്‍മിറ്റുകള്‍ കുറഞ്ഞതെന്ന് കാനഡയിലെ ഇമിഗ്രേഷന്‍ മന്ത്രി മാര്‍ക്ക് മില്ലര്‍ പറഞ്ഞു.

ഖലിസ്ഥാന്‍ നേതാവ് ഹര്‍ദീപ് സിങ് നിജ്ജാറിന്റെ കൊലപാതകവുമായി ഇന്ത്യന്‍ സര്‍ക്കാര്‍ ഉദ്യോഗസ്ഥര്‍ക്ക് ബന്ധമുണ്ടെന്ന കനേഡിയന്‍ പ്രധാനമന്ത്രി ജസ്റ്റിന്‍ ട്രൂഡോയുടെ ആരോപണമാണ് തര്‍ക്കങ്ങള്‍ക്ക് കാരണം.

ആരോപണത്തിന് പിന്നാലെ ഒക്ടോബറില്‍ ഇന്ത്യയില്‍ നിന്നുള്ള ഉത്തരവനുസരിച്ച് 41 നയതന്ത്രജ്ഞരെ ഇന്ത്യയില്‍ നിന്ന് കാനഡ പിന്‍വലിച്ചിരുന്നു. തുടര്‍ന്നുണ്ടായ പ്രതിസന്ധികളാണ് ഇന്ത്യന്‍ വിദ്യാര്‍ഥികള്‍ക്കുള്ള പെര്‍മിറ്റുകളുടെ എണ്ണത്തില്‍ വ്യാപക കുറവുണ്ടാവാന്‍ കാരണം. നിലവിലെ സാഹചര്യം തുടരുകയാണെങ്കില്‍ ഇന്ത്യക്കാര്‍ക്കുള്ള പഠനാനുമതികള്‍ ഉടന്‍ ഉയരാന്‍ സാധ്യതയില്ലെന്നും മന്ത്രി മാര്‍ക്ക് മില്ലര്‍ പറഞ്ഞു.

മറ്റ് കാരണങ്ങള്‍
ഇന്ത്യ- കാനഡ തര്‍ക്കം മുറുകിയത് ഇന്ത്യന്‍ വിദ്യാര്‍ഥികളെ മറ്റ് രാജ്യങ്ങളില്‍ പോയി പഠിക്കാന്‍ പ്രേരിപ്പിച്ചു. മാത്രമല്ല ചില കനേഡിയന്‍ സ്ഥാപനങ്ങളില്‍ താമസ സൗകര്യങ്ങളും മതിയായ അധ്യാപന സൗകര്യങ്ങളും ഇല്ലെന്ന ആശങ്ക മൂലം പല ഇന്ത്യന്‍ വിദ്യാര്‍ഥികളും കാനഡയ്ക്ക് പുറമെ മറ്റ് വഴികളും തേടി തുടങ്ങിയിരുന്നു. കനേഡിയന്‍ സര്‍ക്കാരും രാജ്യത്തേക്ക് പ്രവേശിക്കുന്ന വിദേശ വിദ്യാര്‍ഥികളുടെ എണ്ണം പരിമിതപ്പെടുത്താനുള്ള ശ്രമങ്ങള്‍ ആരംഭിച്ചിട്ടുണ്ട്.