ശരീരത്തിന്റെ ആരോഗ്യ സംരക്ഷണത്തില്‍ പെട്ട പ്രധാനമായ ഒരു ഘടകമാണ് ദന്തസംരക്ഷണം. ആരോഗ്യമുള്ള പല്ലുകള്‍ ആത്മവിശ്വാസത്തിന്റേ അടയാളമാണ് എന്നത്‌പോലെ ശരീരത്തിന്റെ ആരോഗ്യത്തേയും സ്വാധീനിക്കുന്ന ഘടകമാണ്. കൃത്യമായ ബ്രഷിങ്ങ് ചെയ്യാതിരിക്കുന്നത് മൂലം പല്ല് ദ്രവിക്കല്‍, മോണരോഗങ്ങള്‍ തുടങ്ങി നിരവധി രോഗങ്ങള്‍ ഉണ്ടാകാന്‍ സാധ്യതയുണ്ട്. ദിവസവും രണ്ട് നേരം ബ്രഷ് ചെയ്യണം എന്നതിനൊപ്പം തന്നെ ആരോഗ്യ വിദഗ്ധര്‍ നിര്‍ദേശിക്കുന്ന മറ്റൊരു പ്രധാനപ്പെട്ട കാര്യമാണ് ശരിയായ ഇടവേളകളില്‍ ടൂത്ത് ബ്രഷ് മാറ്റണമെന്നത്.

പലരും ടൂത്ത്ബ്രഷിന്റെ നാരുകള്‍ വളയാന്‍ തുടങ്ങിക്കഴിയുമ്പോഴാകും പുതിയ ബ്രഷ് വാങ്ങുന്നതിന് പറ്റി ചിന്തിക്കുന്നത്. എന്നാല്‍ അങ്ങനെയല്ല, മൂന്നുമാസം കൂടുമ്പോള്‍ ടൂത്ത്ബ്രഷ് മാറ്റണം. നാരുകള്‍ വളയാന്‍ തുടങ്ങിക്കഴിഞ്ഞാല്‍ ആ ബ്രഷ് ഉപയോഗിക്കാതിരിക്കുക. ഇതിനായി നിങ്ങളുടെ ടൂത്ത് ബ്രഷിന്റെ അവസ്ഥ എപ്പോഴും ശ്രദ്ധിക്കുക, വളഞ്ഞതോ ഒടിഞ്ഞതോ ആയ നാരുകള്‍, നിറവ്യത്യാസമുള്ള കുറ്റിരോമങ്ങള്‍ എന്നിങ്ങനെയുള്ള മാറ്റങ്ങളെ നിരീക്ഷിക്കുക.

ഓരോ മൂന്നോ നാലോ മാസത്തിലൊരിക്കല്‍ നിങ്ങളുടെ ടൂത്ത് ബ്രഷ് മാറ്റണം എന്നാണ് ദന്തഡോക്ടര്‍മാരും ശുപാര്‍ശ ചെയ്യുന്നത്. അല്ലെങ്കില്‍ കാലക്രമേണ, നിങ്ങളുടെ പല്ലുകളില്‍ നിന്നും മോണകളില്‍ നിന്നും ഫലകവും ബാക്ടീരിയയും നീക്കം ചെയ്യാന്‍ ബ്രഷിന് കഴിയാതെ വരുകയും ദന്തസംബന്ധമായ പ്രശ്‌നങ്ങള്‍ ഉണ്ടാകാനുള്ള സാധ്യത വര്‍ധിക്കുകയും ചെയ്യും.

ഇത് പോലെ പ്രധാനപ്പെട്ട മറ്റൊരു കാര്യമാണ് പകര്‍ച്ചവ്യാധികള്‍, മറ്റ് അസുഖങ്ങള്‍ എന്നിവ വന്നതിന് ശേഷം ടൂത്ത് ബ്രഷ് മാറ്റണമെന്നുള്ളതും.
കാരണം നിങ്ങളുടെ ടൂത്ത് ബ്രഷില്‍ ബാക്ടീരിയകളും വൈറസുകളും നീണ്ടുനില്‍ക്കും. ഇത് വീണ്ടും അണുബാധയിലേക്കോ മറ്റുള്ളവരിലേക്ക് പകരുന്നതിനോ കാരണമാകാം. കൂടാതെ ഓറല്‍ സര്‍ജറി, റൂട്ട് കനാല്‍ തെറാപ്പി, അല്ലെങ്കില്‍ മോണരോഗത്തിനുള്ള ചികിത്സ തുടങ്ങിയ ചില ദന്ത ചികിത്സകള്‍ക്ക് ശേഷവും ടൂത്ത് ബ്രഷ് മാറ്റേണ്ടത് പ്രധാനമാണ്.