പരപ്പനങ്ങാടി: ഹോളി ഫെയ്ത്ത് അന്തര്‍ദേശീയ ടാലന്റ് സെര്‍ച്ച് സ്‌കോളര്‍ഷിപ്പ് പരീക്ഷയില്‍  രണ്ടാം സ്ഥാനം കരസ്ഥമാക്കിയ  പുത്തന്‍പീടിക മുനവ്വിറുല്‍ ഇസ്‌ലാം ഇംഗ്ലീഷ് മീഡിയം സ്‌കൂളിലെ ഒന്നാം ക്ലാസ് വിദ്യാര്‍ഥിനി ഫിന ഫാത്തിമയെ സ്‌കൂളില്‍ സംഘടിപ്പിച്ച സ്വീകരണ ചടങ്ങില്‍ അനുമോദിച്ചു. 2015-16 അധ്യയന വര്‍ഷത്തില്‍ ദേശീയതലത്തില്‍ നടന്ന ഹോളി ഫെയ്ത്ത് ടാലന്റ് പരീക്ഷയിലാണ് ഫിന ഫാത്തിമ രണ്ടാം റാങ്ക് നേടിയത്.
നാടിന്റെയും സ്ഥാപനത്തിന്റെയും അഭിമാനമായി മാറിയ  വിദ്യാര്‍ത്ഥിനിക്ക് അധ്യാപകരും വിദ്യാര്‍ഥികളും നാട്ടുകാരും സ്‌കൂളില്‍ ഒരുക്കിയ  സ്വീകരണത്തില്‍ സ്‌കൂള്‍ പ്രസിഡന്റ് പി വി കുഞ്ഞിമരക്കാര്‍ ഉപഹാരങ്ങള്‍ നല്‍കി. മാനേജര്‍ ടി കുഞ്ഞികോയാമുട്ടി, പ്രിന്‍സിപ്പല്‍ രാമചന്ദ്രന്‍, ശമീം ദാരിമി, സൈതലവി ഫൈസി, പി കോയ സംബന്ധിച്ചു.