കൊച്ചി: ആരാധനാലയങ്ങള്‍ കേന്ദ്രീകരിച്ചുള്ള രാഷ്ട്രീയ ഫണ്ട് പിരിവ് നിയന്ത്രിക്കാന്‍ സര്‍ക്കാര്‍ മുന്നോട്ടുവരണമെന്ന് ഐ.എന്‍.എല്‍ സംസ്ഥാന പ്രവര്‍ത്തക സമിതി യോഗം ആവശ്യപ്പെട്ടു. കത്വവ ഫണ്ട് അടക്കമുള്ള ഫണ്ടുകളെ കുറിച്ച് സമഗ്ര അന്വേഷണം നടത്തി വെട്ടിപ്പിനും അഴിമതിക്കും നേതൃത്വം കൊടുത്തവരെ നിയമത്തിന്റെ മുന്നില്‍ കൊണ്ടുവരണമെന്നും യോഗം ആവശ്യപ്പെട്ടു. സമുദായ ചൂഷണത്തിന് ആരാധനാലയങ്ങള്‍ മറയാക്കുന്ന ശൈലി ഇനിയും തുടരാന്‍ അനുവദിച്ചുകൂടായെന്നും എണറാകുളത്ത് ചേര്‍ന്ന വര്‍ക്കിങ് കമ്മിറ്റി യോഗം പ്രമേയത്തിലൂടെ ഉണര്‍ത്തി.

ഗുജറാത്ത്, ഭഗല്‍പൂര്‍, സുനാമി , പ്രളയം, ഖത്വഉന്നാവോ എന്നിവയുടെ പേരില്‍ നാട്ടില്‍നിന്നും മറുനാട്ടില്‍നിന്നുമായി സംഭരിച്ച അനേകം കോടികളുടെ ഫണ്ട് മുസ്‌ലിം ലീഗ് വീതം വെച്ചെടുത്തിയിരിക്കയാണെന്ന് യോഗം ആരോപിച്ചു. ഇവര്‍ മാതൃകാപരമായി ശിക്ഷിക്കപ്പെടണം. സൗദിയിലേക്ക് പുറപ്പെട്ട് യു.എ.ഇയില്‍ കുടുങ്ങിയ അനേകം മലയാളികളെ ലക്ഷ്യസ്ഥാനത്ത് എത്താന്‍ കേന്ദ്രസര്‍ക്കാര്‍ ഇടപെടണമെന്നും ഈ വിഷയത്തില്‍ കേരളത്തില്‍നിന്നുള്ള എം.പിമാര്‍ സര്‍ക്കാരിന്മേല്‍ സമ്മര്‍ദം ചെലുത്തണമെന്നും ഐ.എന്‍.എല്‍ ആവശ്യപ്പെട്ടു.
പ്രസിഡന്റ് പ്രഫ. എ.പി അബ്ദുല്‍ വഹാബ് അധ്യക്ഷത വഹിച്ചു.