ഒരുക്കങ്ങൾ പൂർത്തിയായി
കോഴിക്കോട്
എസ്.എസ്.എൽ.സി പരീക്ഷയ്ക്ക് തയാറെടുക്കുന്ന വിദ്യാർഥികൾക്ക് ആത്മവിശ്വാസം പകരുന്നതിനായി സുപ്രഭാതം ദിനപത്രം സംഘടിപ്പിക്കുന്ന എയിം എ പ്ലസ് മാതൃകാ പരീക്ഷ നാളെ സംസ്ഥാനത്തിന്റെ വിവിധ കേന്ദ്രങ്ങളിൽ നടക്കും.
എസ്.എസ്.എൽ.സി പൊതുപരീക്ഷയുടെ അതേ മാതൃകയിൽ എല്ലാ മാനദണ്ഡങ്ങളും പാലിച്ചാണ് പരീക്ഷ നടക്കുക. എസ്.കെ.എസ്.എസ്.എഫ് ട്രെന്റ്, സമസ്ത എംപ്ലോയീസ് അസോസിയേഷൻ എന്നിവയുടെ സഹകരണത്തോടെ സംസ്ഥാനത്ത് 13 കേന്ദ്രങ്ങളിലാണ് പരീക്ഷ നടത്തുന്നത്.
വിദ്യാർഥികൾ രക്ഷിതാക്കൾക്കൊപ്പം രാവിലെ 8.20ന് മുമ്പായി പരീക്ഷാ കേന്ദ്രങ്ങളിൽ റിപ്പോർട്ട് ചെയ്യണം.
വെബ്‌സൈറ്റിൽനിന്ന് പ്രിന്റ് എടുത്ത ഹാൾ ടിക്കറ്റിൽ ഫോട്ടോ പതിച്ച് സെൽഫ് അറ്റസ്റ്റ് ചെയ്ത് കൈയിൽ കരുതണം. ഹാൾടിക്കറ്റില്ലാതെ പരീക്ഷാ ഹാളിലേക്ക് പ്രവേശനം അനുവദിക്കില്ല.
8.30 മുതൽ പ്രമുഖ ട്രെയിനർമാരുടെ മോട്ടിവേഷൻ ക്ലാസ് നടക്കും.
രാവിലെയും ഉച്ചയ്ക്ക് ശേഷവും രണ്ടും സെഷനുകളിലായാണ് പരീക്ഷ സംഘടിപ്പിക്കുന്നത്. രാവിലെ 10 മുതൽ 12.45വരെ ഇംഗ്ലിഷ്, കണക്ക്, സോഷ്യൽ സയൻസ് എന്നീ വിഷയങ്ങളിൽ പരീക്ഷ നടക്കും.
വിദ്യാർഥികൾക്ക് അവർ തിരഞ്ഞെടുത്ത ഏതെങ്കിലും ഒരു വിഷയത്തിൽ പരീക്ഷ എഴുതാം. ഉച്ചകഴിഞ്ഞ് 2 മുതൽ 3.45 വരെ ഫിസിക്‌സ്, കെമിസ്ട്രി വിഷയങ്ങളിലാണ് പരീക്ഷ.
ഉച്ചഭക്ഷണം വിദ്യാർഥികൾ കൈയിൽ കരുതണം. പരീക്ഷാ കേന്ദ്രങ്ങളിലേക്ക് പ്രത്യേക ഇൻവിജിലേറ്റർമാരെയും സൂപ്പർ വൈസർമാരെയും കോഓഡിനേറ്റർമാരെയും നിയമിച്ചിട്ടുണ്ട്. പരീക്ഷയ്ക്കുശേഷം വിദഗ്ധരായ അധ്യാപകരുടെ നേതൃത്വത്തിൽ സംശയ നിവാരണ ക്ലാസുകളും ഓൺലൈൻ കരിക്കുലം ക്വിസും ഉണ്ടായിരിക്കും.
പരീക്ഷാഫലം 15 ദിവസത്തിനകം ലഭ്യമാവും. എയിം എ പ്ലസ് പരീക്ഷയിൽ പങ്കെടുക്കുകയും എസ്.എസ്.എൽ.സി പൊതുപരീക്ഷയിൽ മുഴുവൻ വിഷയങ്ങളിലും എ പ്ലസ് ലഭിക്കുകയും ചെയ്യുന്ന വിദ്യാർഥികൾക്ക് സുപ്രഭാതം എക്‌സലൻസി അവാർഡും കരിയർ ഗൈഡൻസ് ക്ലാസും നൽകും. സെയ്ത്തൂൻ ഇന്റർ നാഷനൽ കാംപസിന്റെ സഹകരണത്തോടെയാണ് പദ്ധതി നടപ്പാക്കുന്നത്. കൂടുതൽ വിവരങ്ങൾക്ക് കോഡിനേറ്റർമാരുമായി ബന്ധപ്പെടുക.