സ്വന്തം ലേഖകൻ
മലപ്പുറം
ഊരകം കാരാത്തോട് സുന്നി വഖ്ഫ് ഭൂമിയിൽ മുജാഹിദ് വിസ്ഡം വിഭാഗത്തിന്റെ അനധികൃത കെട്ടിട നിർമാണം പൊളിച്ചുനീക്കി റിപ്പോർട്ട് നൽകാൻ വഖ്ഫ് ബോർഡിന്റ ഉത്തരവ്. മലപ്പുറം വഖ്ഫ് ഡിവിഷൻ ഓഫിസർക്കാണ് ഇതുസംബന്ധിച്ച നിർദേശം സംസ്ഥാന വഖ്ഫ് ബോർഡ് നൽകിയത്. സംഭവത്തിന് കൂട്ടുനിന്ന വഖ്ഫ് മുതവല്ലി പാണ്ടികടവത്ത് അഹമ്മദ് കുട്ടിയെ അന്വേഷണവിധേയമായി 10 ദിവസത്തേക്ക് സസ്‌പെൻഡ് ചെയ്തു. ഇക്കാലയളവിൽ മുതവല്ലി സ്ഥാനത്ത് മലപ്പുറം ഡിവിഷനൽ ഓഫിസിലെ വഖ്ഫ് ഇൻസ്‌പെക്ടറെ നിയമിച്ചു. സസ്‌പെൻഡ് ചെയ്ത മുതവല്ലി ഈ മാസം 16ന് കോഴിക്കോട് ഓഫിസിലെത്തി രേഖാമൂലം വിശദീകരണം നൽകണം. അല്ലാത്തപക്ഷം നടപടികളുണ്ടാവും.

ഊരകം വില്ലേജ് റി.സ 404/5ൽ 18 ആർ ഭൂമിയിലാണ് മുജാഹിദ് വിസ്ഡം വിഭാഗത്തിന്റെ അനധികൃത സ്ഥാപന നിർമാണം തുടങ്ങിയത്. ഭൂമിയുടെ ഇപ്പോഴത്തെ കൈവശക്കാരായ വ്യക്തികൾ മുജാഹിദ് വിസ്ഡം വിഭാഗത്തിന്റെ ജാമിഅ അൽ ഹിന്ദ് ഭാരവാഹികളുമായുണ്ടാക്കിയ ഉടമ്പടി പ്രകാരമാണ് സ്ഥലം വിട്ടുനൽകിയത്. നിലവിലുള്ള കൈവശക്കാരും മുജാഹിദ് വിസ്ഡം പദ്ധതി കൺവീനറുമായ ഫൈസൽ മൗലവിയുമായുണ്ടാക്കിയ ധാരണയിലാണ് അനധികൃതമായി സ്ഥലകൈമാറ്റം നടന്നത്.

ദിനേന ഒമ്പത് ജുസ്അ് ഖുർആൻ പാരായണം ചെയ്യണമെന്നാണ് വഖ്ഫ് ചെയ്തയാളുടെ ലക്ഷ്യം. എന്നാൽ ഇതിനു വിരുദ്ധമായാണ്, മരണപ്പെട്ടവർക്ക് ഖുർആൻ പാരായണം ചെയ്യുന്നതിൽ വിശ്വാസമില്ലാത്ത വിഭാഗത്തിനു സ്ഥാപനത്തിനായി ഭൂമി കൈമാറിയത്. ഇതിനെതിരേ നാട്ടുകാർ വഖ്ഫ് ബോർഡിൽ പരാതി നൽകിയിരുന്നു. തുടർന്നാണ് വഖ്ഫ് ബോർഡ് അന്വേഷണം നടത്തിയത്. സ്‌കൂൾ നിർമാണം എന്ന വ്യാജേനയാണ് കൈവശക്കാരുടെ പേരിൽ പഞ്ചായത്തിൽ 2021 ജൂൺ എട്ടിന് നിർമാണത്തിന് ഇവർ അനുമതിക്ക് അപേക്ഷ നൽകിയത്. വഖ്ഫ് ഭൂമിയിലെ നിർമാണ പ്രവൃത്തികൾക്ക് വഖ്ഫ് ബോർഡിന്റെ അനുമതി വേണം. എന്നാൽ ഇത് കീഴ്‌മേൽ മറിച്ചാണ് ഇവർ അനുമതി തേടിയിരുന്നത്. വഖ്ഫ് ബോർഡിന്റെ അനുമതിയില്ലാതെ നിർമാണത്തിന് അനുമതി നൽകാൻ തദ്ദേശ സ്ഥാപനങ്ങൾക്ക് അധികാരമില്ലെന്നും കാണിച്ച് കഴിഞ്ഞ സെപ്റ്റംബർ 22ന് വഖ്ഫ് ബോർഡ് ഊരകം പഞ്ചായത്തിന് നിർദേശം നൽകിയിരുന്നു. ഇതോടെ പഞ്ചായത്ത് കെട്ടിട നിർമാണം നിർത്തിവയ്ക്കാൻ നോട്ടിസ് നൽകിയിരുന്നു.