കോവളം: കടകള്‍  കുത്തിത്തുറന്ന് മോഷണം നടത്തി പാച്ചലൂര്‍ ചുടുകാട് ക്ഷേത്രത്തിലെ കാണിക്ക വഞ്ചി കുത്തിപ്പൊളിച്ചു കവര്‍ച്ച നടത്താന്‍ ശ്രമിച്ച കേസിലെ പ്രതി പിടിയില്‍. ആവാടുത്തുറ ആലുനിന്ന വിള കോളനിയില്‍ ദിലീപ് ഖാന്‍ (36) ആണ് കോവളം പൊലിസിന്റെ പിടിയിലായത്.
കോവളം, പാച്ചലൂര്‍ തുടങ്ങിയ സ്ഥലങ്ങളിലെ നിരവധി മോഷണക്കേസുകളില്‍ ഇയാള്‍ പ്രതിയാണെന്നും മറ്റൊരു മോഷണക്കുറ്റത്തിന് ജയില്‍ശിക്ഷ അനുഭവിച്ചയാളാണെന്നും കോവളം എസ്.ഐ അജയകുമാര്‍ പറഞ്ഞു. കഴിഞ്ഞ  ബുധനാഴ്ച രാത്രി പാച്ചലൂര്‍ ചുടുകാട് ഭദ്രകാളി ക്ഷേത്രത്തിന്റെ കാണിക്ക വഞ്ചി കുത്തിത്തുറന്ന് മോഷണം നടത്താന്‍ ശ്രമിക്കവെ റോഡിലൂടെ വാഹനം വരുന്നത് കണ്ട് ശ്രമം ഉപേക്ഷിച്ച് പ്രതി കടന്നുകളയുകയായിരുന്നു. തുടര്‍ന്ന് നടത്തിയ അന്വേഷണത്തില്‍ വിഴിഞ്ഞം ഭാഗത്തുവച്ച് ദിലീപ് കോവളം പൊലിസിന്റെ പിടിയിലാവുകയായിരുന്നു.
കഴിഞ്ഞ ഞായറാഴ്ച പുലര്‍ച്ചെയാണ് കോവളം ജങ്ഷനിലെ പെയിന്റും സാനിറ്ററി ഐറ്റംസും വില്‍ക്കുന്ന കടയുടെ പൂട്ട് തകര്‍ത്ത് കടയില്‍
സൂക്ഷിച്ചിരുന്ന 25000 രൂപ മോഷ്ടിച്ചത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.