തിരുവനന്തപുരം: സംസ്ഥാനത്ത് ഹെല്‍ത്ത് കാര്‍ഡ് വിതരണം അട്ടിമറിക്കപ്പെടുന്നതായി പ്രതിപക്ഷം നിയമസഭയില്‍. ഭക്ഷ്യസുരക്ഷാ നിയമം കര്‍ശനമായി നടപ്പാക്കുന്നതില്‍ സര്‍ക്കാര്‍ പരാജയപ്പെടുന്നതായും അടിയന്തര പ്രമേയ നോട്ടിസ് നല്‍കികൊണ്ട് പ്രതിപക്ഷ എം.എല്‍.എ അനൂപ് ജേക്കബ് പറഞ്ഞു.

ജനറല്‍ ആശുപത്രിയില്‍ നിന്ന് 300 രൂപ കൈക്കൂലി വാങ്ങി ദോശ ചുടുന്നത് പോലെ ഹെല്‍ത്ത് കാര്‍ഡ് നല്‍കുന്ന സ്ഥിതിയാണെന്നും കാര്‍ഡുകളെല്ലാം നൂറു ശതമാനം കൃത്യമാണെന്ന് ആരോഗ്യമന്ത്രിക്ക് ഉറപ്പുപറയാനാകുമോയെന്നും പ്രതിപക്ഷം ചോദിച്ചു. ഭക്ഷ്യസുരക്ഷയുമായി ബന്ധപ്പെട്ട അനേകം കോസുകള്‍ കെട്ടിക്കിടക്കുകയാണ്. ഭക്ഷ്യസുരക്ഷയില്‍ സംസ്ഥാനം രണ്ടാം സ്ഥാനത്ത് നിന്ന് ഏഴാം സ്ഥാനത്തേക്ക് കൂപ്പുകുത്തിയെന്നും അനൂപ് ജേക്കബ് പറഞ്ഞു.

എന്നാല്‍ യു.ഡി.എഫ് സര്‍ക്കാരിന്റെ കാലത്ത് നടന്നതിന്റെ 10 ഇരട്ടി പരിശോധനകള്‍ എല്‍.ഡി.എഫ് സര്‍ക്കാരിന്റെ കാലത്ത് നടന്നുവെന്ന് ആരോഗ്യമന്ത്രി വീണാ ജോര്‍ജ് മറുപടി നല്‍കി. ഹെല്‍ത്ത് കാര്‍ഡില്‍ കൃത്രിമം കാണിക്കുന്നവര്‍ക്കെതിരെ കര്‍ശന നടപടി സ്വീകരിക്കുമെന്നും മന്ത്രി പറഞ്ഞു.