ലഖ്‌നൗ: ഉത്തർപ്രദേശിലെ മഥുര ഷാഹി ഈദ്ഗാഹ് മസ്ജിദിൽ ഹിന്ദുത്വവാദികൾ അവകാശവാദം ഉന്നയിച്ചുവരുന്നതിനിടെ പള്ളിയിലേക്കുള്ള വൈദ്യുതി വിച്ഛേദിച്ച് അധികൃതർ. വൈദ്യുതി കണക്ഷൻ നിയമവിരുദ്ധമാണെന്ന് ചൂണ്ടിക്കാട്ടിയാണ് മഥുര പൊലിസിന്റെയും യു.പി വൈദ്യുതി വകുപ്പിന്റെയും സംയുക്ത സംഘം ഞായറാഴ്ച വൈകീട്ടോടെ എത്തി വിച്ഛേദിച്ചത്. കൂടാതെ ഷാഹി ഈദ്ഗാഹ് മസ്ജിദ് കമ്മിറ്റി സെക്രട്ടറിക്ക് വൈദ്യുതി ബോർഡ് പിഴ ചുമത്തുകയുംചെയ്തു. നിയമവിരുദ്ധമായി വൈദ്യുതി കണക്ഷനെടുത്തെന്ന് ആരോപിച്ച് പള്ളി കമ്മിറ്റി സെക്രട്ടറിക്കെതിരേ പൊലിസ് കേസും രജസിറ്റർചെയ്തു. മൂന്നുലക്ഷംരൂപ പിഴയടക്കണമെന്നാവശ്യപ്പെട്ട് പള്ളിക്ക് വൈദ്യുതി ബോർഡ് നോട്ടീസ് നൽകുകയും ചെയ്തു.

പള്ളി നിലനിൽക്കുന്ന ഭൂമിയിലാണ് ശ്രീകൃഷ്ണൻ ജനിച്ചതെന്ന് അവകാശപ്പെട്ട് ഹിന്ദുത്വവാദികൾ നൽകിയ ഹരജി മഥുര കോടതിയുടെ പരിഗണിനയിലാണ്. 1670 ൽ മുഗൾ ചക്രവർത്തി ഔറംഗസീബിന്റെ ഉത്തരവനുസരിച്ച് ക്ഷേത്രത്തിന്റെ 13 ഏക്കർ ഭൂമിയിലാണ് മസ്ജിദ് നിർമിച്ചതെന്നാണ് ഹിന്ദുത്വവാദികളുടെ ആരോപണം.