മണ്ണഞ്ചേരി (ആലപ്പുഴ)
എസ്.ഡി.പി.ഐ നേതാവും മണ്ണഞ്ചേരി പഞ്ചായത്ത് അംഗവുമായ നവാസ് നൈനായെ വധിക്കാൻ ശ്രമിച്ച കേസിൽ രണ്ട് ആർ.എസ്.എസ് പ്രവർത്തകരെ പൊലിസ് അറസ്റ്റ് ചെയ്തു. മണ്ണഞ്ചേരി പൊന്നാട് ലക്ഷ്മി ഭവനത്തിൽ എസ്. ശ്രീനാഥ്(33), അമ്പനാകുളങ്ങര പുതുവീട്ടിൽ കെ.ബിറ്റു(സുമേഷ് 40) എന്നിവരെയാണ് ആയുധങ്ങളുമായി പിടികൂടിയത്. മണ്ണഞ്ചേരി പഞ്ചായത്ത് അഞ്ചാം വാർഡ് അംഗമായ നവാസിനെ ഞായറാഴ്ച രാത്രി 11.30ന് കൊലപ്പെടുത്താൻ ശ്രമിച്ചതായാണ് കേസ്. പൊന്നാട് സ്വകാര്യ ആശുപത്രിക്ക് പടിഞ്ഞാറ് റോഡരുകിൽ ബൈക്കിൽ ഇരിക്കുകയായിരന്ന നവാസിന് സമീപം എത്തിയ ശ്രീനാഥ് കൂടെയുണ്ടായിരുന്ന ബിറ്റുവിൽ നിന്ന് വാൾ വാങ്ങി വെട്ടുവാൻ ശ്രമിക്കുകയും ഈ സമയം നവാസിനൊപ്പമുണ്ടായിരുന്ന സുഹൃത്തും എസ്.ഡി.പി.ഐ പ്രവർത്തകനുമായ നിഷാന്ത് അക്രമണം തടയുകയുമായിരുന്നു. ബഹളം കേട്ട് ഓടിക്കൂടിയവർ ശ്രീനാഥിനെയും ബിറ്റുവിനെയും ആക്രമിച്ചിരുന്നു. ഗുരുതരമായി പരിക്കേറ്റ ഇവരെ സംഭവം അറിഞ്ഞെത്തിയ പൊലിസ് ആലപ്പുഴ മെഡിക്കൽ കോളജ് ആശുപത്രിയിൽ എത്തിച്ചു. ശ്രീനാഥിന്റെ വലതു കണ്ണിന് സാരമായ പരിക്കുണ്ട്. വാളിനുള്ള വെട്ട് തടയുവാൻ ശ്രമിച്ച നിഷാദിന്റെ കൈയ്ക്കും പരുക്കേറ്റു. അതേസമയം കെട്ടിചമച്ച കേസാണെന്ന് ആരോപിച്ച് ആർ.എസ്.എസ് രംഗത്തെത്തിയിട്ടുണ്ട്. കൊല്ലപ്പെട്ട എസ്.ഡി.പി.ഐ നേതാവ് കെ.എസ് ഷാനിന്റെ വീടിന് സമീപം താമസിക്കുന്ന ശ്രീനാഥിന്റെ സുഹൃത്താണ് ബിറ്റുവെന്നും ഇരുവരും വീട്ടിലുണ്ടെന്ന് മനസിലാക്കി ചിലർ ഇവരെ വീട്ടിൽ നിന്നിറക്കി മർദിക്കുകയും ആയുധം കൊണ്ടുവന്ന് വച്ച് പൊലിസിനെ ഉപയോഗിച്ച് കേസെടുപ്പിക്കുകയുമായിരുന്നുവെന്നാണ് ആർ.എസ്.എസിന്റെ ആക്ഷേപം. 2011ൽ വയലാറിൽ ആർ.എസ്.എസ് പ്രവർത്തകനെ വധിക്കാൻ ശ്രമിച്ച കേസിലെ പ്രതിയായ നവാസ് നൈന ഇതേ കേസിലെ സാക്ഷികളായ ശ്രീനാഥിനെയും ബിറ്റുവിനെയും മനപൂർവം കുടുക്കിയതാണെന്നും ആർ.എസ്.എസ് ആരോപിക്കുന്നു.എന്നാൽ നവാസ് നൈനയെ വധിക്കാൻ ശ്രമിച്ചത് ആർ.എസ്.എസ് ഉന്നത തല ഗൂഢാലോചനയുടെ ഭാഗമാണെന്നും അന്വേഷണം നടത്തണമെന്നും എസ്.ഡി.പി.ഐ ജില്ലാ പ്രസിഡന്റ് കെ.റിയാസ് ആവശ്യപ്പെട്ടു.