തിരുവനന്തപുരം: 215 രൂപ വൈദ്യുതി കുടിശിക അടച്ചില്ലെന്ന കാരണത്താല്‍ വിദ്യാര്‍ഥിയായ സംരംഭകന്‍രെ ഐസ്‌ക്രീം കടയുടെ വൈദ്യുതി വിച്ഛേദിച്ച് കെ.എസ്.ഇ.ബി. യുവ സംരംഭകനായ രോഹിത് എബ്രഹാമിന്റെ ഐസ്‌ക്രീം കടയുടെ ഫ്യൂസാണ് കെ.എസ്.ഇ.ബി ഊരിയത്. അറിയിപ്പൊന്നും നല്‍കാതെ ഫ്യൂസൂരിയതിനാല്‍ രോഹിതിന് നഷ്ടം വന്നത് 1,12,300 രൂപയാണ്.

അറിയിപ്പൊന്നും നല്‍കാതെ വൈദ്യുതി വിച്ഛേദിച്ചു നഷ്ടം വരുത്തിയതിനെതിരെ വിദ്യാര്‍ത്ഥി സംരംഭകനായ രോഹിത് വൈദ്യുതി മന്ത്രിക്കു പരാതി നല്‍കി.

കൊല്ലത്താണ് രോഹിതിന്റെ ഐസ്‌ക്രീം കട. ഇപ്പോള്‍ ബംഗളുരുവില്‍ വിദ്യാര്‍ഥിയായ രോഹിത് പ്ലസ് ടുവിന് പഠിക്കുമ്പോഴാണ് ഐസ്‌ക്രീം കച്ചവടത്തിലേക്കിറങ്ങിയത്. വൈദ്യുതി മുടങ്ങിയതിനാല്‍ കടയില്‍ സൂക്ഷിച്ചിരുന്ന ഐസ്‌ക്രീമുകളെല്ലാം ഉപയോഗശൂന്യമായി

മൂന്നു ദിവസം മുന്‍പാണ് കടയുടെ വൈദ്യുതി വിച്ഛേദിച്ചതായി അറിഞ്ഞത്. വൈദ്യുതി വിച്ഛേദിച്ചതായി കെട്ടിട ഉടമയ്‌ക്കോ സ്ഥാപന ഉടമയ്‌ക്കോ അറിയിപ്പു ലഭിച്ചിരുന്നില്ല. അതെ സമയം മുന്‍പ് കടമുറി മുന്‍പ് വാടകയ്ക്ക് എടുത്തിരുന്ന ആളിന്റെ മൊബൈല്‍ നമ്പരിലേക്കാണു മൂന്നാം തീയതി കെഎസ്ഇബിയുടെ സന്ദേശം വന്നതായി അന്വേഷണത്തില്‍ കണ്ടെത്തി.