ലണ്ടന്‍: ഫലസ്തീനില്‍ ഇസ്‌റാഈല്‍ നടത്തുന്ന കൂട്ടക്കുരുതിക്കെതിരെ കനത്ത പ്രതിഷേധവുമായി ലോകരാജ്യങ്ങള്‍. ആയിരക്കണക്കിനാളുകളാണ് വിവിധ രാജ്യങ്ങളില്‍ ആക്രമണത്തെ അപലപിച്ചും ഫലസ്തീനെ പിന്തുണച്ചും തെരുവിലിറങ്ങിയത്. യു.കെയിലും ഫ്രാന്‍സിലും ജര്‍മനിയിലും ഖത്തറിലും ഇറാഖിലുമെല്ലാം ഫലസ്തീന്‍ ഐക്യദാര്‍ഢ്യ സംഗമങ്ങള്‍ നടന്നു.

'ഇത് യുദ്ധമല്ല, വംശഹത്യയാണ്' എന്ന മുദ്രാവാക്യവുമായാണ് സ്‌പെയിനിലെ മാഡ്രിഡില്‍ 2500ഓളം പേര്‍ തെരുവിലിറങ്ങിയത്. ഫലസ്തീന്‍ പതാകയുമേന്തിയായിരുന്നു പ്രതിഷേധം. 'ഞങ്ങളെ അവര്‍ കൂട്ടക്കൊല ചെയ്യുകയാണ്' റാലിയില്‍ പങ്കെടുത്ത ഫലസ്തീന്‍ വംശജ അമീറ ശെയ്ഖ് അലി പറഞ്ഞു.

'ഗസ്സയിലെ ബോംബ് വര്‍ഷം അവസാനിപ്പിക്കുക', 'ഫലസ്തീനെ മോചിപ്പിക്കുക' തുടങ്ങിയ പ്ലകാര്‍ഡുകളുമേന്തിയാണ് ലണ്ടനില്‍ ആയിരങ്ങള്‍ തെരുവിലിറങ്ങിയത്. കെന്‍സിങ്ടണ്‍ ഹൈ സ്ട്രീറ്റിലെ ഇസ്‌റാഈലി എംബസിയിലേക്കായിരുന്നു മാര്‍ച്ച്. ഒരു ലക്ഷം ആളുകള്‍ പിന്തുണ അര്‍പ്പിച്ചതായി സംഘാടകര്‍ പറയുന്നു.

ഫ്രാന്‍സില്‍ പാരീസിന്റെ വടക്ക് ബാര്‍ബ്‌സ് പരിസരത്തും നൂറുകണക്കിന് ആളുകള്‍ ഒത്തുകൂടി. 4,200ത്തോളം സുരക്ഷാ ഉദ്യോഗസ്ഥരെ സ്ഥലത്ത് വിന്യസിച്ചിരുന്നു. റാലി പിരിച്ചുവിടാന്‍ പൊലിസ് കണ്ണീര്‍ വാതകവും ജലപീരങ്കിയും ഉപയോഗിച്ചു. പ്രതിഷേധക്കാര്‍ തിരിച്ച് കല്ലെറിഞ്ഞു.

ഇറാഖില്‍ ബാഗ്ദാദ് ഉള്‍പ്പെടെ അഞ്ച് പ്രവിശ്യകളിലാണ് ഫലസ്തീന്‍ അനുകൂല സംഗമങ്ങള്‍ നടന്നത്. റാലികളില്‍ ഫലസ്തീന്‍ പതാക വീശി.

ഇസ്‌റാഈല്‍ - ലെബനാന്‍ അതിര്‍ത്തിയിലും ഫലസ്തീന്‍ ഐക്യദാര്‍ഢ്യ സംഗമം നടന്നു. ഇവിടെ ഇസ്‌റാഈല്‍ നടത്തിയ വെടിവെപ്പില്‍ ഒരാള്‍ക്ക് പരുക്കേറ്റു.

ജര്‍മനിയില്‍ ബെര്‍ലിനിലും മറ്റ് ചില നഗരങ്ങളിലും ഫലസ്തീന്‍ ഐക്യദാര്‍ഢ്യ സംഗമം നടന്നു. 'ഇസ്‌റാഈലിനെ ബഹിഷ്‌കരിക്കുക' എന്ന ആഹ്വാനവുമായി നടന്ന പ്രതിഷേം ചിലയിടങ്ങളില്‍ അക്രമാസക്തമായി. പൊലിസിനെ നേരെ കല്ലേറുണ്ടായതോടെ പ്രതിഷേധക്കാരെ അറസ്റ്റ് ചെയ്തു.

കൂറ്റന്‍ ഐക്യദാര്‍ഢ്യ സംഗമമാണ് ഖത്തറിലെ ദോഹയില്‍ നടന്നത്. ഇമാം മുഹമ്മദ് അബ്ദുല്‍ വഹാബ് പള്ളി ചത്വരത്തില്‍ നടന്ന സംഗമത്തില്‍ സ്വദേശികളും പ്രവാസികളുമുള്‍പ്പെടെ ആയിരക്കണക്കിനാളുകള്‍ പങ്കെടുത്തു. ഫലസ്തീന്റെയും ഖത്തറിന്റെയും പതാകകളുമായാണ് പ്രതിഷേധക്കാര്‍ അണിനിരന്നത്. ഹമാസ് രാഷ്ട്രീയ കാര്യ തലവന്‍ ഇസ്മയില്‍ ഹനിയ്യയും വേദിയിലെത്തി.

https://www.aljazeera.com/news/2021/5/15/thousands-rally-across-different-countries-to-back-palestinians