മുംബൈ: ഇന്ത്യ - ഓസ്‌ട്രേലിയ ഏകദിന പരമ്പരക്ക് നാളെ മുംബൈയിൽ തുടക്കമാകും. മൂന്ന് ഏകദിനങ്ങളാണ് പരമ്പരയിലുള്ളത്. ആദ്യ മത്സരം വാങ്കഡെ സ്റ്റേഡിയത്തിൽ നടക്കും. ഹാര്‍ദിക് പാണ്ഡ്യയാണ് ആദ്യ ഏകദിനത്തില്‍ ഇന്ത്യന്‍ ടീമിനെ നയിക്കുന്നത്. ക്യാപ്റ്റന്‍ രോഹിത് ശര്‍മ്മ വ്യക്തിപരമായ കാരണങ്ങളാല്‍ വിട്ടുനില്‍ക്കുന്ന സാഹചര്യത്തിലാണ് പാണ്ഡ്യക്ക് ക്യാപ്റ്റന്റെ ചുമതല നൽകിയത്.

നാളെത്തെ മത്സരത്തിന്റെ ടീമിന്‍റെ ഓപ്പണര്‍മാര്‍ ആരൊക്കെയെന്ന് പാണ്ഡ്യ വ്യക്തമാക്കി. ശുഭ്‌മാന്‍ ഗില്ലിനൊപ്പം ഇഷാന്‍ കിഷനാണ് ഇന്ത്യയുടെ ഇന്നിംഗ്സ് ഓപ്പണ്‍ ചെയ്യുക .ഇവർക്ക് പുറമെ വിരാട് കോഹ്‌ലിയും കെ.എല്‍ രാഹുലും സൂര്യകുമാര്‍ യാദവുമായിരിക്കും സ്‌പെഷ്യലിസ്റ്റ് ബാറ്റര്‍മാര്‍ എന്നാണ് സൂചന.

പാണ്ഡ്യക്കൊപ്പം ഓള്‍റൗണ്ടര്‍മാരായി രവീന്ദ്ര ജഡേജയും വാഷിംഗ്‌ടണ്‍ സുന്ദറും ഇടംപിടിച്ചേക്കും. ഇവരില്‍ ജഡേജയും പാണ്ഡ്യയും പ്ലേയിംഗ് ഇലവനിലുണ്ടാകും എന്ന് ഉറപ്പാണ്.