വടക്കൻ ജില്ലക്കാർ
തമീം സലാം കാക്കാഴം
ആലപ്പുഴ
അവധി ദിനങ്ങൾ ആഘോഷമാക്കാൻ ആലപ്പുഴയിലേക്ക് സഞ്ചാരികളുടെ ഒഴുക്ക്. കൊവിഡ് കാരണം പ്രതിസന്ധിയിലായ ടൂറിസം മേഖല ഏറെ നാളുകൾക്കു ശേഷം പഴയ പ്രതാപത്തിലേക്ക് തിരിച്ചെത്തി. വേനലവധി തുടങ്ങിയതോടെ കുടുംബസമേതമാണ് സഞ്ചാരികൾ കായൽ യാത്ര ആസ്വദിക്കാൻ എത്തുന്നത്. നിലവിൽ രണ്ടാഴ്ച വരെ തുടർച്ചായി മിക്ക ഹൗസ്‌ബോട്ടുകൾക്കും ബുക്കിങ്ങുണ്ടെന്ന് ഉടമകൾ പറയുന്നു.
ബുക്ക് ചെയ്തവരിൽ കൂടുതലും ആഭ്യന്തര സഞ്ചാരികളാണ്. കായൽ യാത്രയ്ക്ക് സംഘമായി കൂടുതൽ പേർ എത്തുന്നത് നിലവിൽ വടക്കൻ ജില്ലകളിൽ നിന്നാണ്. മലപ്പുറം, കോഴിക്കോട്, കണ്ണൂർ ഭാഗങ്ങളിൽ നിന്നുള്ള സഞ്ചാരികളാണ് കൂടുതലും എത്തുന്നതെന്ന് ഹൗസ്‌ബോട്ട് ഉടമകൾ പറഞ്ഞു. മറ്റു സംസ്ഥാനത്തു നിന്നുള്ളവരും എത്തുന്നുണ്ട്. കൊവിഡ് മൂന്നാം തരംഗത്തിൽ ഹൗസ് ബോട്ട് മേഖലയ്ക്ക് കാര്യമായ ചലനം ഉണ്ടായിരുന്നില്ല. നിലവിൽ വിദേശ വിനോദ സഞ്ചാരികൾ കുറവാണെങ്കിലും അടുത്ത മാസത്തോടെ അവർ കൂട്ടമായി എത്തുമെന്ന പ്രതീക്ഷയിലാണ് മേഖലയിലുള്ളവർ. ഏതാനും ആഴ്ചകളായി ശനി, ഞായർ ഉൾപ്പെടെ അവധി ദിനങ്ങളിൽ വലിയ തിരക്കാണ് അനുഭവപ്പെടുന്നത്.സീസൺ എത്തിയിട്ടും ചാർജ് വർധനവില്ലാത്തത് സഞ്ചാരികൾക്ക് ആശ്വസമാണ്. വേമ്പനാട്ട് കായലിനെ ആശ്രയിച്ച് ആലപ്പുഴ കുമരകം മേഖലയിലായി 1,200ഓളം ഹൗസ് ബോട്ടുകളും 700 ശിക്കാര മോട്ടോർ ബോട്ടുകളുമാണുള്ളത്. ടൂറിസം ഉണർന്നതോടെ ടാക്‌സി, റിസോർട്ട് മേലകളും അനുബന്ധ വ്യാപാര രംഗവും സജീവമായിട്ടുണ്ട്.