കോട്ടയം: ക്ഷമിക്കണേ...ഗതികേട് കൊണ്ടാണ് താന്‍ പ്രതിഷേധിച്ചതെന്ന് കെ.എസ്.ആര്‍.ടി.സിയില്‍ സ്ഥലം മാറ്റിയ കണ്ടക്ടര്‍ അഖില നായര്‍. സര്‍ക്കാരിനെ അപകീര്‍ത്തിപ്പെടുത്തിയിട്ടില്ല. വകുപ്പിനെ അപഹസിച്ചിട്ടില്ല. ആരുടെയും ജോലിയോ യാത്രയോ തടസപ്പെടുത്തിയിട്ടില്ല. തികച്ചും സമാധാനപരമായാണ് പ്രതിഷേധിച്ചതെന്നും അത് തന്റെ വീട്ടിലെ അടുപ്പില്‍ തീപുകയാത്തതുമായി ബന്ധപ്പെട്ട തന്റെ തികച്ചും വ്യക്തിപരമായ കാരണമാണെന്നും അഖില വ്യക്തമാക്കി.

അറിയുമോ അന്ന് രാവിലെ ജോലിക്ക് പോകുമ്പോഴാണ് ആര്യനാട് ഡിപ്പോയിലെ ഡ്രൈവര്‍ ആത്മഹത്യ ചെയ്‌തെന്ന വാര്‍ത്ത കേട്ടത്. എന്താനാ ആത്മഹത്യ ചെയ്തത്. ഇതെല്ലാം കൂടെ കേള്‍ക്കുമ്പോള്‍ എന്തെങ്കിലും ചെയ്യണ്ടേ…നമ്മളൊരു ജനാധിപത്യ രാജ്യത്തല്ലേ ജീവിക്കുന്നത്. ഒന്ന് പ്രതികരിക്കാനുള്ള സ്വാതന്ത്ര്യം പോലുമില്ലേ? കുട്ടികളൊക്കെയുള്ളതല്ലേ…

'2022 ഡിസംബര്‍ മാസത്തിലെ ശമ്പളം ജനുവരി 11ആയിട്ടും കിട്ടിയിട്ടില്ല. കൈയ്യില്‍ പൈസയില്ല. മാനസിക സംഘര്‍ഷം മൂലം ഏതെങ്കിലും വിധത്തില്‍ പ്രതിഷേധിക്കണം എന്ന് കരുതി. തങ്ങള്‍ ഇനി എങ്ങനെ ജീവിക്കും. ഇവിടുത്തെ ജോലി തുടരാന്‍ മറ്റൊരു ജോലിക്കു പോകണമെന്നാണോ എന്നും അവര്‍ പറയാതെ പറയുന്നു.
വകുപ്പിനെ ശല്യപ്പെടുത്താതെ, ജോലി തടസപ്പെടുത്താതെ, യാത്രക്കാരെ ബുദ്ധിമുട്ടിക്കാതെയാണ് പ്രതിഷേധിച്ചത്. പൈസയില്ലാതെ എങ്ങനെ ജീവിക്കും. 13 വര്‍ഷമായി കെ.എസ്.ആര്‍.ടി.സിയില്‍ ജോലി ചെയ്യുന്നു. ഇന്നുവരെ മോശപ്പെട്ട ഒന്നും എന്റെ ഭാഗത്ത് നിന്നുണ്ടായിട്ടില്ല,' എന്നും അഖില വ്യക്തമാക്കി.