ലഖ്‌നൗ: യു.പിയില്‍ മാസ്‌ക് ധരിക്കാത്തതിന് യുവാവിന്റെ കൈകാലുകളില്‍ പൊലിസ് ആണിയടിച്ചുകയറ്റിയതായി പരാതി. ബറേലിയിലെ ജോഗിനവാദയിലാണ് സംഭവം.
രഞ്ജിത് എന്ന യുവാവിന്റെ കൈകാലുകളില്‍ പൊലിസ് ആണിയടിച്ചെന്നുകാണിച്ച് മാതാവ് മാതാവ് ശൈലാദേവിയാണ് പൊലിസ് സൂപ്രണ്ടിന് പരാതി നല്‍കിയത്. മാസ്‌ക് ധരിച്ചില്ലെന്ന് പറഞ്ഞ് വീടിനുമുന്നില്‍നിന്ന് പൊലിസ് കൂട്ടിക്കൊണ്ടുപോയ മകനെത്തേടി താന്‍ പൊലിസ് സ്റ്റേഷനിലെത്തിയെങ്കിലും അവിടെയില്ലെന്ന മറുപടി ലഭിച്ചെന്നും പിന്നീട് ഏറെ നേരത്തെ തെരച്ചിലിന് ശേഷം കണ്ടെത്തുമ്പോള്‍ ഗുരുതരമായി പരുക്കേറ്റ യുവാവിന്റെ കൈകാലുകളില്‍ ആണി അടിച്ചുകയറ്റിയ അവസ്ഥയിലായിരുന്നുവെന്നും മാതാവ് പറഞ്ഞു. റോഡരികില്‍ അബോധാവസ്ഥയില്‍ കിടക്കുകയായിരുന്നു മകന്‍.
മകനെ അന്വേഷിച്ച് പൊലിസ് സ്റ്റേഷനിലെത്തിയപ്പോള്‍ തന്നെ പൊലിസ് ജയിലിടുമെന്ന് ഭീഷണിപ്പെടുത്തിയെന്നും അമ്മ പൊലിസ് സൂപ്രണ്ടിന് നല്‍കിയ പരാതിയില്‍ പറയുന്നു. രഞ്ജിത് ഇപ്പോള്‍ ജില്ലാ ആശുപത്രിയില്‍ ചികിത്സയിലാണ്.
അതേസമയം പൊലിസ് സംഭവം നിഷേധിച്ചു. യുവാവ് സ്വയം ആണിയടിച്ചു കയറ്റിയതാണെന്നും മാസ്‌ക് ധരിക്കാത്തതിനും പൊലിസിനോട് മോശമായി പെരുമാറിയതിനും യുവാവിനെതിരേ കേസെടുത്തിട്ടുണ്ടെന്നും എസ്.പി രോഹിത് സജ്‌വാന്‍ പറഞ്ഞു.
കേസില്‍നിന്ന് രക്ഷപ്പെടാനാണ് പൊലിസിനെതിരേ ആരോപണമുന്നയിക്കുന്നത്. ആരോപണം തെറ്റാണെന്ന് കണ്ടെത്തിയിട്ടുണ്ടെന്നും എസ്.പി പറഞ്ഞു.