ന്യൂഡല്‍ഹി: കൊവിഡ് വാക്‌സിനേഷന്‍ സര്‍ട്ടിഫിക്കറ്റുകള്‍ സമൂഹമാധ്യമങ്ങളില്‍ പങ്കുവയ്ക്കരുതെന്ന് കേന്ദ്ര ആഭ്യന്തരമന്ത്രാലയത്തിന്റെ മുന്നറിയിപ്പ്.
സര്‍ട്ടിഫിക്കറ്റില്‍ വ്യക്തിയുടെ പേര്, ആധാര്‍ നമ്പറിന്റെ അവസാനത്തെ നാലക്കങ്ങള്‍ അടക്കമുള്ള വ്യക്തിഗത വിവരങ്ങള്‍ ഉള്ളതിനാലാണ് കേന്ദ്രം മുന്നറിയിപ്പ് നല്‍കിയിരിക്കുന്നത്. വാക്‌സിന്‍ സ്വീകരിച്ച തിയതി, സമയം, വാക്‌സിന്‍ നല്‍കിയ ആളുടെ പേര്, വാക്‌സിന്‍ സ്വീകരിച്ച സെന്റര്‍ തുടങ്ങിയവയും സര്‍ട്ടിഫിക്കറ്റിലുണ്ട്. ഈ വിവരങ്ങള്‍ സൈബര്‍ തട്ടിപ്പ് സംഘങ്ങള്‍ ദുരുപയോഗം ചെയ്യാനിടയുണ്ടെന്നാണ് മുന്നറിയിപ്പ്.

കേന്ദ്ര ആഭ്യന്തര മന്ത്രാലയത്തിന്റെ സൈബര്‍ സുരക്ഷ ബോധവത്കരണ ട്വിറ്റര്‍ ഹാന്‍ഡിലായ സൈബര്‍ ദോസ്ത് അക്കൗണ്ടിലൂടെയാണ് മുന്നറിയിപ്പ് നല്‍കിയിരിക്കുന്നത്. ആദ്യഡോസ് വാക്‌സിന്‍ സ്വീകരിച്ചശേഷം പ്രൊവിഷനല്‍ സര്‍ട്ടിഫിക്കറ്റും രണ്ടാം ഡോസിനുശേഷം ഒറിജിനല്‍ സര്‍ട്ടിഫിക്കറ്റുമാണ് നല്‍കുന്നത്. വാക്‌സിന്‍ സ്വീകരിച്ച പലരും സര്‍ട്ടിഫിക്കറ്റുകള്‍ സമൂഹമാധ്യമങ്ങളില്‍ അപ്‌ലോഡ് ചെയ്യുന്നുണ്ട്.