ദുബൈ: തിരുവനന്തപുരത്തു നിന്നു ദുബൈ, അബുദാബി എന്നിവിടങ്ങളിലേക്ക് എയര്‍ ഇന്ത്യ എക്‌സ്പ്രസ് സര്‍വീസുകള്‍ വര്‍ധിപ്പിച്ചു. ആഴ്ചയില്‍ 5 വീതം സര്‍വീസുകള്‍ ഉണ്ടായിരുന്നത് 6 എണ്ണമാക്കി. രണ്ടിടങ്ങളിലേക്കും തിങ്കളാഴ്ചകളിലാണു പുതിയ സര്‍വീസ്. ഇതോടെ ദുബൈയിലേക്കു തിരുവനന്തപുരത്തു നിന്നുള്ള പ്രതിവാര സര്‍വീസ് 28 ആയി.അബുദാബിയിലേക്കു 40. വിദേശത്തേക്ക് എയര്‍ ഇന്ത്യ എക്‌സ്പ്രസ് ആണ് ഏറ്റവും കൂടുതല്‍ സര്‍വീസുകള്‍ നടത്തുന്നത് - 70 എണ്ണം.

അതേ സമയം, അവധിക്കാലത്ത് കുടുംബസമേതം നാട്ടിലേക്കും വിദേശത്തേക്കും പറക്കുന്ന പ്രവാസികള്‍ക്ക് തിരിച്ചടിയായി എയര്‍ഇന്ത്യയുടെ ടിക്കറ്റ് നിരക്ക് വര്‍ധന. രണ്ട് മുതല്‍ 12 വയസുവരെയുള്ള കുട്ടികള്‍ക്ക് 20 ശതമാനം വരെ ഇളവ് നല്‍കിയിരുന്നതാണ് പിന്‍വലിച്ചത്. എയര്‍ഇന്ത്യ എക്‌സ്പ്രസ് ടാറ്റ ഏറ്റെടുത്ത ശേഷമുള്ള പരിഷ്‌കാരങ്ങളുടെ ഭാഗമായാണിത്. ബഡ്ജറ്റ് എയര്‍ലൈനുകളില്‍ എയര്‍ ഇന്ത്യ എക്‌സ്പ്രസ് മാത്രമാണ് കുട്ടികള്‍ക്ക് ഇളവ് നല്‍കിയിരുന്നത്.

എയര്‍ ഇന്ത്യ എക്‌സ്പ്രസിന്റെയും എയര്‍ ഏഷ്യ ഇന്ത്യയുടെയും ടിക്കറ്റ് ബുക്കിംഗ് ഒരു പ്ലാറ്റ്‌ഫോമിലാക്കാന്‍ ബുക്കിംഗ് വെബ്‌സൈറ്റ് പരിഷ്‌കരിച്ചിരുന്നു. അതിന് ശേഷമാണ് കുട്ടികള്‍ക്കും മുതിര്‍ന്നവര്‍ക്കും ഒരേ നിരക്ക് ഈടാക്കുന്നത്. രണ്ട് വയസുവരെയുള്ള കുട്ടികള്‍ക്ക് ടിക്കറ്റിന്റെ ടാക്‌സ് മാത്രം അടച്ചാല്‍ മതി ഈ ആനുകൂല്യവും മാറ്റി ഫുള്‍ടിക്കറ്റ് ആക്കാനുള്ള ആലോചനയിലാണ് എക്‌സ്പ്രസ്.